Herat, Naitung:
Ki bor pyniaid ka Afghanistan ha ki khyndiat sngi ba la leit, ki la thang pyn-um lut ia baroh ki tiar put- tiar tem hapoh ka nongbah Heart, kum shi bynta ban pynpaw ia ka jingbym sngewtynnad ia ki sur jingtem- jingput.
Namar katkum ka jingsngewthuh jong ki bor pyniaid ka Taliban, la ong ba ki jingtem- jingput ki ialam bakla ia ki paidbah bad ki samla khynnah ha kane ka juk kin shu ia khleh biej bad bud ruma ia ki rongphong jong ka pyrthei ha ka rukom ka bym dei.
Ha kajuh ka por la ong ba naduh ba ka Taliban ka ioh ban don ha ka bor naduh u Nailar jong u snem 2021, ki bor pyniaid ka Taliban ki la nang wanrah bad pyntreikam suki- suki ia ki aiñ bad ki kyndon ban khang bad pyrkhing ia ki paidbah nongshong shnong hynrei kiba kham shah ktah jur ki dei ki kynthei namar kim ioh shuh ia ka hok ban im laitluid kumba long kiwei pat ki kynthei ha kiwei ki ri.
La ong ba ha katei ka Sngi Saitjaiñ jong ka taiew ba la lah, ka jingthang ia kitei ki tiar put- tiar tem ka long kaba la heh bha bad da spah Dollar ki tiar tem kiba la shah pynduh ei bad shah thang pyn-um ha katei ka sngi.
Kitei ki tiar tem ki kynthup ruh naduh ka Guitar, harmonium, table, ki drum bad kiwei- kiwei de.
Shuh shuh ruh la ong ba ki kynthei nongshong shnong jong ka Afghanistan ki la shah synshar don bor bha naduh ba wan ka sorkar Taliban hapoh ka ri bad kim lah shuh ban iaid ban ïeng ne ban pynpaw dur ialade khlem da kup ia ka jaiñ kup ‘hijab’.
Naduh ki khynnah haduh ki samla kynthei, ki la shah khang ban leit sha ki jaka pule- puthi, ki la shah khang ban leit sha ki skul bah, bad ki la shah khang ruh ban leit trei bad wat ban leit sha ki jaka shangkai pyngngad kum ki park, ki jaka kilan met bad kiwei- kiwei.
Dang ha ka taiew ba la lah, da ki hajar tylli ki dukan khapshñiuh bad dukan pynbhabriew jong ki kynthei ha kylleng jong ka ri, ki la shah khang noh. Kane ka long hadien ba ki bor pyniaid ka Taliban ki kynnoh ba ka dor jong kitei ki jait kam ka la rem than eh.
