Jowai, Nailar 01:
Ka Dulong ka la pynjem khnap ïa ka NSA haduh shiteng dorjon (6-0 kol) na ka bynta ban khur ïa ka jingjop ha ka lympung ïalehkai Independence Day Cup Under-17 Football Tournament ba la pynïaid da ka West Jaiñtia District Sports Association (WJDSA)
Ha kane ka jingïakhun kaba la long ha ka sngi Ba-ar ha madan Kiang Nangbah Stadium, Jowai, ka Dulong ka la lah ban pynpaw ïa ka jingtbit ha kaba ka la lah ban ïalehkai bha naduh kaba sdang. U Sahame Lyngdoh u la ïoh ban pynkhih jar nyngkong eh ha ka minit kaba 22. Hadien hynñiew minit kane ka kynhun ka la pynbud biang ïa ka kol kaba ar lyngba u Yobhalangki Ryngkhlem.
Hadien shiteng kynta jong ka jingïalehkai ka Dulong ka la thep biang ïa ka kol balai lyngba u Lovingstar Suting ha ka minit kaba 31. Kane ka kynhun ka la thep ïa ka kol kaba saw lyngba u Kynsaikupar Bareh ha ka minit kaba 47. Hashwa ban wai ka Dulong la thep biang sa ar kol lyngba u Da o chwa Shylla (51) bad u Janial Rasmut (54) na ka bynta ban khur syndon ïa ka jingjop.
Haba phai sha kawei pat ka jingïalehkai kaba ar hapdeng ka Lion SC pyrshah ïa ka Tpeppale ki la ïasam mar shi point hadien ba ïakhaid mar 1-1 kol. Ka Treppale ka la pynkhih jar nyngkong lyngba u D. Dkhar ha ka minit kaba 40, hynrei u Niawki Phawa u la lah ban pynphai kylla ha ka minit kaba 59 na ka bynta ka Lion.
