Shillong, Nailar 01:
Ka kynhun ki rangïalehkai hockey ka ri India ka la poi ïuhkjat ha Chennai ha ka Sngi Ba-ar, namar kane ka nongbah jong ka Tamil Nadu kan ïoh ban pynlong ïa ka Asian Champions Trophy ka ban sdang naduh 3 tarik mynta u bnai.
Na ka liang u coach u Craig Fulton u la pynpaw ïa ka jingsngew skhem ha kane ka kynhun ïa kaba la dep ban jied ïa ki rangïalehkai na ka bynta kane ka lympung bad ba ki lah ban ïalehkai bha ha Major Radhakrishnan Hockey Stadium. “Kan long ka jingïarap ban pynkhlaiñ ïa ka kynhun haba ka ïoh ban ïalehkai hakhmat ki paidbah nongkyrshan.”
“Baroh ki kwah ba kane ka kynhun kan ïalehkai bha. Te kumta ngi thrang eh ban khur ïa ka jingjop namar ngi khmih lynti ba kane ka kynhun kan ïalehkai bha,” la ong u Fulton.
“Ka long ka jingkmen kaba khraw ban ïoh ïalehkai ha kane ka lympung ha la ïing. Ngi la pynkhreh bha na ka bynta kane ka lympung. Te kumta ngi khmih lynti ban ïalehkai bha bad khamtam eh ha ka jingïalehkai kaba nyngkong jong kane ka lympung,” u la bynrap.
Kane ka lympung ka long ruh shi bynta ban pynkhreh ïa ka Asian Games kaba la thmu ban sdang ha u Nailur bad Risaw. Ha kane ka lympung ka India kan ïakhun pyrshah ïa ka South Korea, Malaysia, Pakistan, Japan bad ka China ha ka round-robin stage.
Ha katei ka lympung jong ka Asian Champions Trophy, ka India kan ïakhun nyngkong pyrshah ïa ka China ha ka 3 tarik. Kane ka kynhun ïalehkai ka ri kan pynkhreh ïa ka jingïakhun kaba ar pyrshah ïa ka Pakistan ha ka 9 tarik.
Ïa kane ka kynhun yn ïalam da u rangïalehkai ‘dien u Harmanpreet Singh, bad u rangïalehkai shapdeng u Hardik Singh kum u Vice-Captain.
