Jowai, Nailar 01:
Ki hat-trick ba la khur da u Chembun Suna bad u Jamris Talang ki la biang pura ban pynlong ïa ka Rising Mukhla bad Pamanik ban khur ïa ka jingjop ha ka lympung ïalehkai 3rd Division Football Tournament (3rd Adelbert Memorial Trophy) ba la pynïaid da ka West Jaiñtia District Sports Association (WJDSA) ha ka sngi Ba-ar ha Kiang Nangbah Stadium, Jowai.
Ha ka jingïakhun kaba nyngkong, ka Rising Mukhla ka la pynliem noh ïa ka Saindur Mihmyntdu da da 7-1 kol. U Chembun Suna u la ïoh thep kol ha ka minit kaba 40, 43 & 46 na ka bynta ban khur ïa ka hat-trick. U D. Nongrum u la thep ar kol ha ka minit kaba 52 & 56. Katba ïa kiwei pat ki kol la thep da u Rimi Pyrtuh (30) bad u Phrangsngi Challam (35). Katba na ka Saiñdur Mihmyntdu la thep da u Kenal Dkhar (68).
Haba phai sha kawei pat ka jingïakhun kaba bud, ka Pamanik ka la pynliem noh ïa ka Catholic Youth da 4-2 kol. U Jamris Talang khur ïa ka hat-trick hadien ba u la ïoh ban thep ha ka minit kaba 2, 33 & 60 bad ïa ka kol kaba kham hashwa la thep da u Emlang Pakma (9). Katba ka Catholic Youth ka la ïoh ei haduh ar kol na ka daw ka jingbakla thep hi u rangïalehkai ka Pamanik u B. Langstang ha ka minit kaba 46 bad 53.
