Shillong, Nailar 01:
Ka Shillong Lajong Football Club ka la pyllait ïa ki kyrteng ki rangïalehkai ki ban ïashim bynta na kane ka klob ha ka Durand Cup ka ban sdang mynta u bnai ha ki lai tylli ki jaka.
Kane ka kynhun ïalehkai hapoh ka jingïalam u Bah Bobby L. Nongbet kum u coach ka la don ha ka Group-D kaba kynthup lang ïa ar tylli ki kynhun ïalehkai Indian Super League kum ka NorthEast United FC bad ka FC Goa lem bad ka Downtown Heroes FC.
Te kumta ka Shillong Lajong kan ïakhun nyngkong eh pyrshah ïa ka NorthEast United FC ha ka 3 tarik ha Indira Gandhi Athletic Stadium ha Guwahati ha ka por 6 baje janmiet.
Ha kane ka kynti ka Lajong ka la sei kham bun da ki rangïalehkai ka Jylla. Napdeng ki 30 ngut, 24 ngut ki dei ki Khasi bad kiba sah la pynrung da kiba na ka thaiñ shatei Lammihngi.
“Kane ka lympung ïalehkai jong ka Durand Cup ka long kum ka jingsdang ban pynkhreh ïa ka lympung ïalehkai I-League jong ka aïom ka ban wan,” la pynpaw u Bah Bobby haba ïakren bad u nongthoh khubor.
“Mynta ka kynti ngin pynmih khambun da ki rangïalehkai kiba dei ki Khasi bad tang katto katne ngut kiba na ka thaiñ shatei lammihngi. Kane ka long ban plie lad ïa ki ha ka Durand Cup bad kumjuh ha ka I-League ka ban sa long shen,” la bynrap u Coach.
Ka Lajong kan pynkhreh ïa ka jingïakhun ba ar pyrshah ïa ka FC Goa ha ka 8 tarik bad ïa ka Downtown Heroes ha ka 13 tarik.
Ki kyrteng ki 30 ngut ki rangïalehkai ka Lajong ki kynthup ia u Atlanson Kharmaw, Abhay Chhetri, Batskhemlang Thangkhiew, Neithovilie Chalieu, Rajat Paul Lyngdoh, Wanteilang Malngiang, Henryford Nongneng, Ronnie Willson Kharbudon, Kenstar Kharshong, Saveme Tariang, Iohborlang Lyngdoh Lyngkhoi, Kynsaibor Lhiud, Gladdy Nelson Kharbuli, Hardy Cliff Nongbri, Santi Janai Shianglong, Hamedamanbha Wahlang, Ronalkydon Lyngdoh Nonglait, Shano Tariang, Everbrightson Sana Mylliempdah, Kynsailang Khongsit, Figo Syndai, Wadajied Kynsai Ryngkhlem, Pursunep, Laiwang Bohham, Dibinroy Nongspung, Allen Camper Lyngdoh Nongbri, Phrangki Buam, Istarbor Marngar, Ngamsanglena Haokip bad u Donboklang Lyngdoh.
