
Shillong, Nailar 01:
Ka SSL Lyngkyrdem ka la rah ïa ka nam lahduh ha ka lympung ïalehkai 4th UUP Invitation Football Tounament 2023 ryngkat ka song pisa kaba T. 2,50,000 kaba la long ha ka sngi Saitjaiñ ha UUP Stadium Urksew Pynursla.
Kane ka jinglah ban khur ïa katei ka nam ka la wan hadien ba ka la lah ban pynliem noh ïa ka Umphrup SC lyngba ka tie-breaker da 13-12 kol.
Haba phai sha katei ka jingïakhun final baroh ar ki kynhun ki la ïakhun tyngeh naduh kaba sdang, hynrei haduh kaba kut ka jingïalehkai kim shym la lah ban pynkhih jar. Hynrei dei ha ka extra time ba kitei ki kynhun ki la ïathep mar shi kol ha kaba ka Umphrup SC ka la ïoh ban pynkhih jar nyngkong bad tang hadien 2 minit ka SSL ka la ïoh ban pynphai lyngba ka free-kick kaba itynnat bha.
Dei ha ka jingïashut ia ka tie-breaker ba ka SSL Lyngkyrdem ka la lah ban thep haduh 13-12 kol ïa ka liang pyrshah na ka bynta ban khur syndon ïa ka jingjop.
Ïa ki khusnam sha kine ki kynhun la sam da u CEM ka KHADC u Bah Pynïaid Sing Syiem kum u kongsan ryngkat u Bah Bibat Syiem, Chief Engineer ka State Sports Council of Meghalaya (SCM) kum u symbud kongsan.