Shillong, Nailar 01:
Ka lympung ïalehkai Under-14 (Boys) Football League 2023 ba la pynïaid da ka Shillong Sports Association (SSA) ka la nang jam shaphrang ha kaba phra tylli ki kynhun ki la jam sha ka quarter final.
Kine ki kynthup ïa ka Nangkiew Irat SC, Mawreng SC, Umphyrnai SC, Rangdajied United FC, PFR Football Academy, Sohryngkham, Mawkriah West bad ka Mawlai SC.
Kine ki kynhun kin pynkhreh ban ïaknieh rung sha ka semi final ha ka sngi Saitjaiñ (5 tarik). Ka Nangkiew Irat kan ïakhun pyrshah ïa ka Mawreng ha ka por 11 baje, ka Umphyrnai SC ïa ka Rangdajied United ha ka por 12:30 mynsngi, ka PFR Football Academy ïa ka Sohryngkham ha ka por 2:30 noh phai sngi bad ka Mawkriah West ïa ka Mawlai SC ha ka por 4:15 janmiet.
Ki kynhun ki ban khur ïa ka jingjop kin jam sha ka semi final kaba la thmu ban pynlong ha ka 12 tarik bad ïa ka final yn sa pynbna hadien.
