
Shillong, Nailar 01:
Ka Lamlynti FC (Laitlyngkot) bad ka Mawpdang SC ki la khur ïa ka jingjop kaba nyngkong na ka Group-C ha ka lympung ïalehkai U-20 4th Division Football League 2023 ba la pynïaid da ka Shillong Sports Association.
Ha ka jingïakhun kaba la long ha ka Sngi Ba-ar ha madan Third Ground Polo, ka Lamlynti ka la pynliem noh ïa ka Riatsamthiah SC da 3-0 kol. Kane ka la wan urlong lyngba u Rigelstar Suting, Pyrkhatjanai Kharkongor bad u Khlaiñkupar Ïawphniaw.
Naduh kaba sdang kane ka jingïakhun, baroh ar ki kynhun ki la pyrshang ban ïakhun tyngeh, hynrei ha ka minit kaba 15 ka Lamlynti ka la ïoh ban pynkhih jar nyngkong eh lyngba u Rigelstar Suting bad kane ka kynhun ka la pynbud biang ïa ka kol kaba ar lyngba u Pyrkhatjanai Kharkongor ha ka minit kaba 28 na ka bynta ban tam ar kol haduh kaba kut jong ka kylla step.
Hadien ba la bteng ïa ka jingïakhun jong ka kylla miet, ka Lamlynti ka la ïoh ban thep ïa ka kol kaba lai lyngba u Khlaiñkupar Ïawphniaw ha ka minit kaba 61. Haduh kaba kut jong kane ka jingïalehkai ka Riatsamthiah kam shym la lah ban pynphai bad ka la mad ïa ka jingshah rem kaba nyngkong ha kane ka lympung.
Haba phai sha kawei pat ka jingïakhun, ka Mawpdang SC ka la pynliem noh ïa ka Umsohsun SC lyngba ka shi kol na u Mebanshanlang Khongsit ha ka minit kaba 35.
Ka jingïalehkai jong ka Group-D kan long ha ka sngi Balang hapdeng ka Laitkroh SC pyrshah ïa ka Mawlyngngad SC ha ka por 2 baje, katba ka Diengpasoh SC ïa ka Mawnianglah YSC ha ka por 4:15 janmiet.