Banyumas, Naitung:
Ha kane ka khubor la ong ba 8 ngut ki briew ki la sahkut hapoh ka par ksiar jong ka dew lynnong Java hapoh Indonesia bad la 5 sngi mynta ki tnat iarap ki dang ialeh ban khlong bad tih ia katei ka jaka ban ioh sei ioh lehse ki don kiba dang im hapoh jong katei ka par.
La ong ba ki don shibun tylli ki par kiba la shu pyntreikam be-aiñ ha katei ka thaiñ bad bun na kitei ki par be-aiñ ki ju mad ia kitei ki jingjia na ka por sha ka por.
La ong ba kitei ki nongtrei shapoh jong katei ka par, ki dang pyrshang ban tih ia ka jingjylliew ba 60 metre lane kumba 200 phut ha ka shnong pancurendang jong Central Java ha ka janmiet Sngi Ba-ar jong ka taiew ba la leit ha kaba kyndit kynsan ka um ka la leit tuid bad rung sha katei ka par kaba ki dang tih ban pynjylliew bad baroh ki la shah tyllup ha katei ka um kaba la leit rung bad tap lup ia katei ka thliew.
Ki briew jong ka kynhun iarap ki la ialeh ban tan bad pyntuid noh ia katei ka um sha kawei pat ka wah kaba don hajan hynrei la ong ba ka um ka dang iai bteng ban shlei bad tuid sha katei ka par bad kaba la wanrah jingeh ia ki kynhun iarap ba kin ngam bad sei ia baroh kiba don hapoh jong katei ka par.
Kumta, la ong ba namar la 5 sngi mynta kim pat lah ban ioh sei ia kitei kiba don hapoh jong ka par bad la sngewthuh ruh ba baroh kiba shah tap ha ka um ha katei ka par ki la khlad lut.
Ki bor pyniaid jong katei ka nongbah ki la pyntip ba kin sa phah noh da ki nong- ngam um ban leit wad hi noh bad ban ioh sei ia ka met jong kitei kiba la sahkut baroh.
Bun na kitei ki nongtrei par kiba ngat ha katei ka jingjia, ki dei kiba phet na kiwei pat ki par ba marjan bad katei hi ka jaka.
Ki pulit katei ka nongbah ha ka Sngi Thohdieng ki la bat noh ia 4 ngut ki nongkhaïi halor ka jingsuba don kti ban pyntreikam ia kitei ki par ksiar be-aiñ.
Ha u snem 2021, la don 6 ngut kiba la khklad ha ka dew lynnong Sulawesi Island hadien ba ka par ksiar ba ju pyntreikam be-aiñ ka la twa bad tap-lup ia ki ha katei ka jingjia.
Kumjuh ruh 16 ngut ki la khlad noh ha kine ki 2 snem ba la leit ha ka jingtwa jong ki par ksiar kiba don ha katei hi ka dew lynnong, ha kaba baroh ki nongtrei par ki la shah tap im bad iap hangta.
Ha u snem 2016 pat, 11 ngut ki nongtih mar poh khyndew ki la duh ei la ka jingim ha ka jingtwa ka khyndew hajan jong kawei ka par ksiar kaba don ha ka thaiñ Sumatra jong ka thaiñ Jambi.
