Shillong, Nailar 01:
Ka Meghalaya Police Football Team ka la wanphai biang sha ka Shillong League mynta ka aïom hadien saw snem ba kam shym la ïashim bynta shuh ha kane ka lympung.
Kane ka kynhun ka la ïashim bynta khatduh eh ha ka First Division ha u 2019. Hynrei mynta ka aïom kan shim bynta naduh ka kyrdan Third Division ban ïa pyni bor pyrshah ïa ki 20 tylli ki kynhun ïalehkai kiba don ha kane ka kyrdan.
Kat kum ki bor ba la ïoh lum na ki bor pynïaid jong ka SSA, la pynpaw ba ha ka jingshisha ka MLP kaba la sangeh ïalehkai kumba katto katne snem, ka la dei ban ïashim bynta naduh Fourth Division. Na ka daw ka jingbym lah ban sei ïa ka kynhun ïalehkai Under-20, ki bor pynïaid ki la hap ban ailad noh ba kan ïashim bynta naduh ka Third Division.
Na ka liang ka SSA ka la pynbna ba ïa ka Third Division Football Tournament 2023 na ka bynta ka Shillong Recreation Ground Trust (SRGT) yn sdang naduh 17 tarik mynta u bnai ha madan Third Ground, Polo.
Nalor ka MLP, kiwei pat ki kynhun kiba don ha ka Group-A ki long ka Umlyngka SC, Lapalang SC, Krang SC, Nongmynsong SC bad ka Gorkha Association. Ha ka Group-B ki long ka Nongkseh SC, Mawshbuit SC, Pay For Right Football Academy, Pomlakrai SC bad ka Mawryngkneng SC. Ha ka Group-C ki kynthup ïa ka Sanmer SC, Umpling SC, Mawpat SC, Mylliem Lum SC bad ka Lumparing SC. Haba Group-D ki long ka Nongumlong SC, Lawmali Pyllun SC, Rynjah SC, Tynring SC bad ka Lumdiengjri SC.
Ki kynhun ki ban ïakhun nyngkong ha ka 17 tarik kin long hapdeng ka Umlyngka SC pyrshah ïa ka Lapalang SC bad ka Krang SC ïa ka Nongmynsong SC. Katba ka MLP kan ïakhun nyngkong pyrshah ïa ka Gorkha Association ha ka 28 tarik mynta u bnai.
