Guwahati, Nailar:
U Myntri Rangbah ka Assam u Himanta Biswa Sarma u la ong ba ma u, ki Myntri bad ki heh sorkar kin sa leit ban jngoh ïa ki 25,501 tylli ki shnong ha ki 15 sngi ban ithuh bad sngewthuh shai ïa ki jingdonkam na ka bynta ban pyntreikam ïa kiba bun ki skhim.
Ha ka jingphah khubor jong u lyngba ka Twitter, u la ong ba ka sorkar jylla kan sa pynlong ïa ki prokram kaba heh ba la tip kum ka “Raijyor Xomadhon kaba dei ka prokram ban pynshai bad sngewthuh shai ïa ki jingeh jong ki briew bad ban weng noh ïa ki, kane ka long ruh shi bynta ban don ka jingïasngewthuh jingmutlang hadeng ki paidbah bad ka sorkar khnang ba kan lah ban ïakynduh markhmat bad sngewthuh ïa ki jingeh jong ki.
Ki heh sorkar kin sa leit sha man ki distrik hashwa ka jingleit jngoh jong ki Myntri khnang ban lah ban lum jingtip ba bniah shaphang ki nongïoh myntoi kiba long katkum ki jingtreikam jong ki skhim sorkar bapher bapher bad ban ai jingïarap ïa ki.
Kumba la thmu, la ong ba ka jingleit jngoh jong ki Myntri sha kitei ki shnong kan sa sdang hapdeng ka 1 tarik, Risaw bad ka 15 tarik, Risaw.
