Shillong, Nailar 02:
Ka Meghalaya Police Football Team ka la pynjem khnap ïa ka Mylliem SC haduh shiteng dorjon (6-0 kol) na ka bynta ban khur ïa ka jingjop ha ka Knockout Football Tournament 2023 ba la pynïaid da ka Ri Khasi Social Cultural and Sports Club ha ka sngi Balang.
Ha kane ka jingïakhun kaba la long ha madan Kurkalang kaba ha Bhoi Rymbong, ka MLP ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Aldrin Monlang Ramsiej ha ka minit kaba 25 bad hadien lai minit ka la pynbud biang ïa ka kol kaba ar lyngba u Pynshailang L. Lyngkhoi.
Hadien shiteng kynta ka MLP ka la thep biang ïa ka kol kaba lai lyngba u Everwell Khongjee ha ka minit kaba 33 na ka bynta ban tam da 3-0 kol ha ka kylla step.
Hadien katto katne por ba la bteng biang ïa ka jingïakhun jong ka kylla miet, ka MLP ka la ïai bteng biang ban ïakhun tyngeh bad dei ha ka minit kaba 60 ba ka la ïoh ban thep kol biang lyngba u Teiborlang Siangshai.
Hashwa ban kut ka jingïalehkai, ka MLP ka la ïoh ban thep kol biang lyngba u Ramos Ingti ha ka minit ba 68 bad ïa kawei pat la thep da u Chesterfield Nongdhar ha ka minit kaba 72.
Haduh kaba kut ka jingïalehkai ka Mylliem kam shym la lah ban pynphai bad ka la mad ïa ka jingshah rem ha kane ka lympung. Te kumta lyngba kane ka jingjop, ka MLP ka la jam sha ka pre-quarter final.
Ka jingïakhun pre-quarter final kan sdang naduh ka 5 tarik mynta u bnai hapdeng ka Risyon FC pyrshah ïa ka Shillong Lajong FC (reserved team) ha ka por 2 baje janmiet.
