Beijing, Nailar:
Ki lad pathai khubor na China ha ka Sngi Balang ki la iathuh ba 20 ngut ki la khlad bad kumba 19 ngut pat ki la jah rngai hadien ka jingshah lynshop jong ka nongbah Beijing ha u ‘lapbah uba jur bad uba la wanrah ia ki jingjia bapher bapher.
Ki bor pyniaid ka China ha katei ka sngi ki la phah ia ki liengsuiñ shipai ban leit rah ia ki jingdonkam bad ban kit ruh ia ki paidbah nongshong shnong kiba dang sahkut ha kitei ki thaiñ ba shlei um bad kiba la shah lynshop ha ka ‘eriong ha katei ka sngi.
La ong ba ka ‘eriong ba la khot kyrteng ka ‘Kosuri’, ka la nang khlaiñ bor shuh-shuh bad ka la leit ban iaid lyngba ia ka thaiñ North jong ka China naduh ka Sngi Thohdieng jong ka taiew ba la lah.
Kumjuh ruh la ong ba ka Beijing ka la ioh mad ia u slap uba jur khlem sangeh naduh ka Sngi Saitjaiñ jong ka taiew ba la leit bad kane ka long kumba ka aïom slap ba katei ka nongbah ka dei ban ioh mad man la ka sngi ha une u bnai baroh shi bnai hynrei utei u slap u la wan hap lut noh tang hapoh jong ki 40 kynta.
Kumta, ki tnat pathai khubor jong ka Beijing ha ka Sngi Ba-ar ki la pynbna ia ka jingdon kiba khlad bad shah ktah na kitei ki jingjia slap bad shlei um ha kaba ka jingdon kiba khlad ruh ka la kiew sha ka 11 ngut bad 27 ngut kiba dang jah rngai naduh kitei ki sngi tad haduh jong ka step Sngi Ba-ar.
Kumjuh ruh la ong ba ka kynhun shipai jong ka China ka la phah ia 26 ngut ki shipai lyngba jong 4 tylli ki liengsuiñ ‘helicopter’ ban leit iarap sha katei ka thaiñ ba shah ktah jur ha utei u slap.
Ha ka 31 tarik u Naitung, bun tylli ki thaiñ jong ka nongbah Beijing kynthup ia ka Fangshan bad Mentougou, ki la mad ia shibun ki jing julor na ka jingshlei um, ha kaba 3 tylli ki rel ki la hap ban sangeh treikam noh shipor namar ka jingshah ker kut ki lynti iaid rel ha katei ka nongbah.
Kumba 1,50,000 tylli ki longiing ruh kiba la shu shong tyrkhong khlem bam- khlem dih bad kim don shuh wat tang ka um bam- um dih ba kin pyndonkam. Namarkata, ka tnat iarap ka la phah ia 45 tylli ki kali kit um ban leit sam um sha kitei ki longiing kiba la kyrduh um sha kiba bun tylli ki bynta jong katei ka nongbah.
Hadien ba la iohi ia ka jingshah lynshop jong ka Beijing ha utei u ‘lapbah, ka tnat ‘Emergency’ ka la maham ruh da ka ‘Red Alert’ ha ki thaiñ jong ka Hebei, ha kaba ka tnat Meteorological ka la maham ia ki nongshong shnong ba kin long ba la pynkhreh ia ki jingjia shlei um bad ki jingtwa khyndew bad ba kin phikir ialade lada ki don ha kum kitei ki jaka kiba ap jingma na ki bor jong ka mariang.
Ka nongbah Beijing ka la pyntreikam ia ka ‘Flood Control Reservoir’ ha ka Sngi Nyngkong bad ka long ka sien ba nyngkong eh ban pyntreikam ia katei ka rukom naduh ba la wanrah ia ka hapoh ka ri ha u snem 1998.
La ong ba ka China ka la ioh mad ia ka suiñ bneng kaba sniew bha ha une u snem bad khamtam ha kane ka aïom Lyiur jong une u snem.
Ki riew shem phang ki la maham lypa ruh ba ka jingshlei um ha China ha une u snem ka lah ban kham jur ban ia kaba la jia ha u Naitung jong u snem 2012, ha kaba 79 ngut ki la khlad bad da ki phew hajar ki paid’ nongshong shnong ki la shah pynkynriah shnong noh ha utei u snem.
Watla katta, la ong ba ka China ka dang pyn-ap sa ia kawei pat ka ‘erlangthari ka ban long ka ‘erlangthari kaba hynriew (6) ia ka China ba kan ioh mad ha une u snem namar la iohi lypa ia ka jingdon jong ki kynja ‘erlangthari ha ki bynta East jong ka duriaw China.
