Shillong, Nailar 02:
Ka Laitkroh SC bad ka Mawñianglah YSC ki la khur ïa ka jingjop kaba nyngkong ha ka lympung ïalehkai SSA U-20 Fourth Division Football League 2023 ha ka sngi Balang.
Ha ka jingïakhun kaba nyngkong kaba la long ha madan Third Ground, Polo, ka Laitkroh SC ka la pynliem noh ïa ka Mawlyngngad SC lyngba ka shi kol ba la thep da u Robinson Kurkalang ha ka minit kaba 39.
Haba phai sha kawei pat ka jingïakhun kaba ar, ka Mawñianglah YSC ka la jop da 3-2 kol ïa ka Diengpasoh SC bad u Evinstar Nongkhlaw u la thep ar kol.
Tang mar ïasdang ka jingïakhun, ka Diengpasoh ka la pynkhih jar nyngkong eh lyngba u Bapynïadei Swer ha ka minit kaba 10, hynrei ka Mawñianglah ka la lah ban pynphai kylla lyngba u Evinstar Nongkhlaw ha ka minit ba 23.
Hadien shiteng kynta u Evinstar u la thep biang ïa ka kol kaba ar ha ka minit kaba 35. Ka Diengpasoh ka la pynphai kylla lyngba u Bapynkmenlang Kharsati ha ka minit kaba 57.
Ka Mawñianglah ka la thep biang sa shi kol lyngba u Geral Rangslang ha ka minit kaba 70 na ka bynta ban khur syndon ïa ka jingjop.
Ka jingïalehkai ha ka Sngi Palei kan long hapdeng ka Madan S&CC pyrshah ïa ka Dilingiem YSCWA ha ka por 2 baje, katba ka Lumpyngngad SC ïa ka Ïatyllilang SC ha ka por 4:15 janmiet.
