Shillong, Nailar 02:
Kan long kabu ksiar ïa ki khynnah ïalehkai ki ban ïashim bynta mynta u snem ha ka International Subroto Mukherjee Cup ha kaba kin shah jied ban mihkhmat ha ki lympung ïalehkai ka All India Football Federation (AIFF) ryngkat ka baibam.
Kane ka la wan hadien ba ka AIFF bad ka Subroto Mukherjee Sports Education Society (SMSES) ki la soi ïa ka Memorandum of Understanding (MoU) ha ka sien kaba nyngkong eh ha ka sngi Balang ha ka jingïalang kaba la long ha ka nongbah Delhi.
Ka jingïasoi hapdeng kine ar tylli ki synjuk ka long ban kyntiew ïa ki lympung ïalehkai phutbol jong ki khynnah kiba dangkhie dangsan khnang ba kin long kiba paw ha ka lawei ka ban wan.
Lyngba kane ka MoU kan long ka jingplie lad ïa ka SMSES ba kan pynmih ïa ka kynhun ïalehkai jong ka Subroto XI ba kan ïashim bynta ha ki lympung jong kiba dangkhie dangsan (youth competitions) ban pynlong da ka AIFF. Hadien kata kan jied pat ïa kiba kynsai na baroh lai tylli ki kyrdan ïalehkai (U-17 Boys, U-17 Girls & U-14 Boys) ki ban ïashim bynta ha ka International Subroto Mukherjee Cup ka ban sa long shen ha ka nongbah Delhi.
Katei ka Selection Committee na ka bynta ka Subroto XI kan kynthup ïauwei u dkhot ban thung da ka SMSES bad uwei na ka Sports Authority of India (SAI), lem bad ar ngut ka ban thung da ka AIFF ki ban long ki dkhot jong katei ka komiti.
La ong ba ka Selection Committee kan hap ban shim ïa ka jingkitkhlieh ban ithuh ïa ki nongïalehkai kiba kynsai bad hadien kin sa khot ïa ki ban don bynta hapoh ka kynhun jong ka Subroto XI ha la ki jong ki kyrdan.
Kumjuh ruh na ka liang ka AIFF kan ailad ïa ka Subroto XI ba kan ïoh rung sha ka AIFF Youth League na ka bynta ki shynrang bad kynthei ha la ki jong ki kyrdan ïalehkai naduh ka aïom ïalehkai 2023-24.
La ong ruh ba haduh 25 ngut ki nongïalehkai ki ban shah jied ha ka Selection Committee na ki kyrdan ïalehkai U-17 Boys bad U-17 Girls ki ban ïoh ïa ka baibam kaba tang shisien ha ka jingsiew kaba T. 25,000/- man laiwei pa iwei na ki nongïalehkai kynthei bad shynrang. Kane kajuh ka khusnam ka long na ka bynta ka Sub-Junior (U-14) ha kaba ki khynnah ïalehkai kin ïoh mar T. 15,000/-.
Ki nongïalehkai ki ban shah jied na ka Subroto Cup ha baroh lai tylli ki kyrdan ïalehkai kin hap hapoh ka Talent Development Scheme, bad kin shah khot sha ka prokram jingpynkhreh na ka kynhun ïalehkai ka ri.
Shuh shuh la ong ba ka AIFF kan ailad ruh ïa ki klob ISL, I-League bad IWL ba kin jied ïa ki nongïalehkai ba kynsai tang mar ïasdang ka Subroto Cup.
