Shillong, Nailar 02:
U Gianluigi Buffon ha ka sngi Balang u la pynbna ban shongthait noh na ka kam ïalehkai ha ka rta kaba 45 snem hadien ba u la ïadon bynta ban khur jingjop ha ka World Cup na ka Italy, kumjuh ki nam jop bad ka Juventus.
Utei u rangapkol u dangsah ka kontrak bad ka Parma kaba ïashim bynta ha ka Serie B bad kumta u la mih noh na kajuh ka klob kaba u la sdang ïa ka kam ïalehkai ha ki lai phew snem mynshwa.
U Buffon u la ïadon bynta ban khur ïa ka nam lahduh ha ka World Cup 2006 bad ban pynurlong ïa ka nam lahduh kaba 10 sien ha ka Serie A na ka bynta ka Juventus. U la ïadon bynta ruh ban khur ïa ka nam lahduh ha ka Ligue 1 na ka bynta ka Paris St Germain. “Haba phi plie lad, ka dei ka kamram ka jong nga ban leh eiei. Kum ka kynhun ïalehkai ngi la lah ban pynurlong ïa ka jingjop lyngba ka jingïatrei lang hapoh ka kynhun,” la ong u Buffon.
Une u rangapkol ba kynsai, ha ka aïom ba la lah u la mad jingeh na ka daw ki jingmynsaw hadien ba u la leit phai sha ka Parma, kaba ïashim bynta ha ka second division kaba ha Italy.
Lyngba ka jinglah ban ïalehkai bha na ka Parma, u Buffon u la leit ïasoh sha ka Juventus ha u 2001 bad hadien u la leit ïasoh sha ka PSG ha ka aïom ïalehkai 2018-19. Hadien u la leit sha Turin hashwa ba un leit ïalehkai noh sha ka klob rim ka Parma ha u Jylliew jong u snem 2021.
U Buffon u la lah ban pynpaw ruh ïa ka jingtbit ha ka World Cup 2006 naba u la shah thep tang ar kol ha ki hynñiew sien ïakhun na ka bynta ka Italy kaba la khur ïa ka nam lahduh.
Shuh shuh u Buffon u la long u budlum jong ka Juventus, kaba la khur ïa ka nam lahduh haduh shiphew sien ban rah ïa ka Serie A. Une u rangïalehkai u la ïai neh bad katei ka klob hadien u 2006, ha kaba kane ka kynhun ka la shah pynhiar kyrdan noh sha ka Serie B.
U Buffon u la mih noh na ka Juventus ha u 2018 na ka bynta ka Paris Saint-Germain bad ha u 2021 u la leit phai sha ka Parma.
