Jowai, Nailar 02:
Ka lympung ïalehkai 3rd Division Football Tournament na ka bynta ka 3rd Adelbert Memorial Trophy ba la pynïaid da ka West Jaiñtia District Sports Association (WJDSA) ka la nangjam shaphrang ha madan Kiang Nangbah Stadium, Jowai.
Ha ka jingïakhun kaba la long ha ka sngi Balang, ka Khliehmyntdu Neinshnong ka la pynliem noh ïa ka Umshangiar da 3-2 kol bad u Fivestarson Shylla u la ïoh ban khyrwit ar kol.
Ha kane ka jingïakhun, ka Umshangiar ka la ïoh pynkhih jar nyngkong eh lyngba u Lakhon Bareh ha ka minit kaba 16. Hadien shiphew minit ka Khliehmyntdu ka la pynïakhaid kylla lyngba u Fivestarson Shylla.
U Fivestarson u la thep biang ïa ka kol ba ar ha ka minit kaba 41, hynrei ka Umshangiar ka la lah ban pynïakhaid kylla lyngba u Kdup Dkar ha ka minit kaba 66. Ka Khliehmyntdu ka la thep ïa ka kol kaba khatduh lyngba u Toto Sana ha ka minit kaba 70 na ka bynta ban khur syndon ïa ka jingjop.
Haba phai sha kawei pat ka jingïakhun hapdeng ka Pateinki Sabah bad ka Mookyrdup ki la ïasam mar shi point hadien ba ïakhaid mar 1-1 kol. Na ka Pateinki la thep da u Mechwaki Dkhar ha ka minit kaba 6, hynrei ka Mookyrdup ka la pynphai kylla ha ka minit kaba 72+2 lyngba u Deliverance Plain.
