Shillong, Nailar 02:
Ka South Africa ka la lah ban pynurlong ha ka sien kaba nyngkong eh ban jam sha ka pre-quarter final ha ka Women’s World Cup hadien ba pynliem ïa ka Italy da 3-2 kol ha ka sngi Ba-ar.
Ha kane ka jingïakhun kaba la long ha Wellington kaba ha New Zealand, ka kapten jong ka South Africa ka Thembi Kgatlana ka la lah ban pynpaw ïa ka jingtbit na ka bynta ban pynurlong ïa ka kynhun ban thep ïa ka kol kaba nyngkong hashwa ban kut ka jingïalehkai ha ka minit kaba 92.
Kane ka jinglah ban thep ïa katei ka kol kam mut tang ba kan ïakynduh pyrshah ïa ka Netherlands ha ka pre-quarter final, hynrei ka la lah ruh ban pynleit ïing noh ïa ka Italy.
Ka ’thei ïalehkai na Italy ka Arianna Caruso ka la ïoh ban thep ar kol ha kane ka lympung. Pynban ha kaba kut kam shym la lah ban pynurlong ïa la ka kynhun ïalehkai ban jam sha kawei pat ka wat na ka daw ka jingshah khanglad ha ka Kgatlana.
Kane ka jingïakhun kan long ka jingsah kynmaw ha ka khana pateng ïalehkai phutbol jong ka kynhun ki ’thei ïalehkai ka South Africa bad kaba la lah ban jam sha uwei pat u mawjam ha ka World Cup jong ki kynthei.
Ki ’thei ïalehkai ka Italy kim lah khlem da jaw ummat naba ka jingïaid lynti ha kane ka lympung kan poi noh sha kaba kut na ka daw ka jingshah rem ha ka liang pyrshah.
“Ha kine ki artaïew nga la duh noh ïa lai ngut ki dkhot jong ka ïing. Ha ka jingshisha nga la dei ban leit phai noh sha la ïing, hynrei nga la jied ban ïai sah bad ka kynhun,” la ong ka Kgatlana kaba ïalehkai na ka Racing Louisville ha United States.
Na ka liang ka coach ka Desiree Ellis, ha kaba ka kynhun jong ka, ka la shah rem da 2-1 kol ha ka Sweden bad ïakhaid mar 2-2 kol pyrshah ïa ka Argentina, ka la bynrap da kaba ong, “Kane ka long kaba phylla ba ngi la lah ban pynurlong ïa ka jingjop.”
“Kane ka jingjop ka long na ka bynta ki paidbah kiba la wan ban ai jingkyrshan ïa ngi. Kane ka jingjop ka long na ka bynta jong ki.”
Kumba ka long mynta ka Sweden ka la ïoh ban bat ïa ka kyrdan ba hakhlieh na ka Group-G da kaba kamai 9 point, hadien la bud pat sa ka South Africa kaba la kamai 4 point. Ka Italy kaba la wan balai ka la mai 3 point bad ka Argentina ka la don ha ka kyrdan ba shatrai bad shi point.
Ka Caruso ka la ïoh ban pynkhih jar nyngkong eh lyngba ka penalty ha ka minit kaba 11. Hadien shiteng kynta ka South Africa ka la ïoh ei shikol na ka daw ka jingbakla thep hi ka ’thei ïalehkai na Italy ka Benedetta Orsi ka ha ka minit kaba 32.
Ka South Africa ka la ïoh ban thep ïa ka kol kaba ar lyngba ka Hildah Magaia ha ka minit kaba 67, hynrei ka Caruso ka la lah ban pynïakhaid kylla na ka bynta ka Italy ha ka minit kaba 74 na ka bynta ban ïakhaid mar 2-2 kol.
Hashwa ban kut ka jingïalehkai, ka Kgatlana ka la lah ban pynurlong ïa ka South Africa ban khur ïa ka jingjop hadien ba la thep kol hashwa ban kut ka jingïalehkai.
Haba phai sha kawei pat ka jingïakhun kaba ar, ka Jamaica ka la lah ban pynthikna ban jam sah ka pre-quarter hadien ba ka la ïakhaid khlem don bat hep kol pyrshah ïa ka Brazil ha Melbourne.
Kumba ka paw ka France ka dei ka kynhun kaba la bat ïa ka kyrdan ba hakhlieh jong ka Group-F ha kaba ka la kamai 7 point, katba ka Jamaica ka la don ha ka kyrdan ba-ar da kaba kamai 5 poit bad ka Brazil ka la kamai 4 point.
