Maiduguri, Nailar:
Ki nongshong shnong jong ka nongbah Borno kaba don sha ka phang shathie jong ka Nigeria ha ka Sngi Nyngkong ki la iathuh ba ki lehnoh Islamic ki la khrai khlieh ia kumba 10 ngut ki nongrep jong katei ka shnong.
Ha ka taiew ba la leit, ki lehnoh ki la pyniap ia kumba 25 ngut ki paidbah nongrep bad ki la thombor bad pynmynsaw pat ia bun ngut ki nongshong shnong jong 2 tylli ki shnong ka nongbah Borno.
Kitei ki paidbah ki iathuh ba ki lehnoh Islamic ki la leit thombor ia kitei ki nongrep ha ka por kumba 8:30 jong ka step Sngi Nyngkong bad ki leit poi sha kitei ki shnong ruh lyngba jong ki thuk-thuk ha ryngkat bad ki suloi heh ba ki kieng ha ka met jong ki.
Uwei na ki para marjan jong kitei ki nongrep ba shah pyniap u iathuh ba ha katei ka step u lap ia 10 tylli ki khlieh jong ki paralok jong u kiba ju ia rep lang man la ka sngi bad kiba ia sah marjan bad u ha katei hi ka thaiñ.
Ki nongshong shnong ki iathuh ba katei ka kam thombor kan dei beit ka jingleh jong ki lehnoh Islamic ba ju tip kum ka ‘Boko Haram’.
Hynrei ka Islamic State of West Africa (ISWAP) ruh ka ju iadon bynta lang ha ki kam thombor hapoh Borno.
La ong ba katei ka jingleit thombor ki lehnoh, ka la ktah jur ia ki shnong kyndong kiba ju pyniaid ia ka rep- ka riang ha katei ka nongbah bad kane ka lah ruh ban wanrah ia ki jingeh haba iadei pat bad ka jingkiew dor ki mar rep bad kumta ter-ter.
