Beijing, Nailar:
Ka Beijing ha ka Sngi Palei ka la ialeh katba lah ban pynkloi ia ki lad jing-iarap bad ban pynkynriah noh ia ki paidbah nongshong shnong hadien ba u slap bad ka jingshlei um ba la wanrah da ka ‘erïong Doksuri bad kiba la pynthud ia ki kam ki jam baroh naduh ka jing-leit pynpoi ia ki bam- ki dih ruh ka long kaba eh ha kane ka por. Ha kajuh ka por ruh la ong ba ka jingdon jong kiba khlad na katei ka jingjia ka la kiew 20 ngut ha ka Sngi Ba-ar hadien ba katei ka ‘erïong ka la leit iaid lyngba ia ka phang North jong ka China ha ka taiew ba la lah.
Kumta, ki bor pyniaid jong ka distrik Fangshan hapoh ka nongbah Beijing ki la shu phah leit da ki helicopter naka bynta ban leit pynpoi jingbam bad ban sam bam- sam um sha ki paidbah nongshong shnong jong ki thaiñ kiba la kyrduh bam namar ka jingshah khah kut ki surok bad ki lynti- synkien hadien ka jingshlei um ha kitei ki thaiñ ba marjan.
Kumjuh ha ka shnong Tianjin ba marjan pat, ha kaba u slap uba jur u la ther khlem sangeh, ki bor pyniaid ki la pynkynriah noh ia palat 35,000 ngut ki nongshong shnong jong katei ka bynta bad ka sorkar ka la pynsah ia ki ha ki jaka sah ba shi por katba ka dang pyrshang ban pynbha biang ia ki post ilektrik ban pyniaid bor ding biang sha katei ka thaiñ, kumjuh ruh ka um bad ki laiñ ban ioh iakren phone.
Ka jingiap ki briew ha ka nongbah Beijing ka la kot 11 ngut ha ka Sngi Ba-ar, ha kaba 13 ngut pat ki dei kiba dang jah rngai. Ka tnat khmih suiñ bneng jong ka China ka iathuh ruh ba u slap uba la ther ia ka nongbah Beijing ha kitei ki khyndiat por ba la leit, u la jur bad palat ban ia kaba la jia ha u Naitung jong u snem 2012 ha kaba shibun ki jingjia ki la jia na ka jingjur u slap, sha ka jingtwa khyndew, ki jingshlei um bad kiwei kiwei bad shibun ngut ruh kiba la khlad ha utei u snem.
Kumjuh ruh u President ka China, u Xi Jinping u la bthah ia ki tnat ba dei khmih ba kin wad shitom ia kitei kiba dang jah rngai bad ban ioh pyllait im ruh ha ka por kaba biang lada ki dang don bad sahkut ha ki jaka kiba dang don jingkyrmen ban lait im.
La ong ruh ba na ka thaiñ Hebei, ki don haduh 9 ngut kiba khlad bad 6 ngut pat ki dang jah rngai tad haduh kane ka step Sngi Balang.
