Sao Paulo, Nailar:
Katkum ki khubor la iathuh ba kitei ki phetwir ki la im khlem bam- khlem dih haduh 14 sngi hadien ba ka bam ba ki don ka la lut noh tang ha ka sngi kaba 10 ba ki la shong ha ki iing dara ha Atlantic, ha i iing dara ba ki ker halor ka jhad Cargo.
Hadien ki 10 sngi ba la lut ki bam ki dih ba ki pynkhreh, kitei ki phetwir ki la im bad shong la ka shong khlem bam sa kumba 4 sngi lynter, hynrei ki la shu dih tang da ka um suda tad haduh ban da ioh ban leit pyllait im ia ki da ka tnat pulit Brazil na ka phang Southeast jong ka jaka sangeh jngad ha Vitoria.
La ong ba kitei ki phetwir ki la wan poi ha katei ka jaka hadien ka jingiaid lynti kumba 5,600 Kilometre lane 3,500 mile lyngba ka duriaw, da ka jingkyrmen skhem ruh ba kin ioh ia ka jingim ba thymmai bad ka jingim kaba pahuh- pahai ynda ki la poi sha katei ka jaka ba ki thmu. Pynban la ong ba kitei ki phetwir ki la pynpaw ka jingsngewsih kaba khraw hadien ka jingiakynduh jong ki ia katei ka jingeh ha shiteng lynti bad shuwa ba kin poi noh sha ka jaka ba ki thmu.
Namar la ong ba kitei ki phetwir ki thmu ban leit poi sha Europe hynrei ka jingpoi iaid bakla jong ka jhad rit ba ki shong, ka la pynpoi pynban ia ki sha ka duriaw Atlantic jong ka duriaw Brazil.
Hadien kane, 2 ngut na kitei ki phetwir ki la rai ban leit phai biang noh sha Nigeria hynrei 2 ngut pat ki thmu ban shong noh shipor hapoh Brazil.
