Shillong, Nailar 03:
Ka Jylla ka la khmih lynti ban khur bun ki takma na ka rynsan ïakura jong ka BFI East Zone Men’s Boxing Championship 2023, ka ban sdang naduh 17 haduh 19 tarik u Nailar ha madan Kurkalang, Bhoirymbong, Ri-Bhoi District.
Kane ka long ka sien ba-ar ba ka Jylla kan ïoh ban pynlong ïa kane ka rynsan ïakura naduh ba ka la pynlong nyngkong ha u snem 2019. Te kumta ha kane ka kynti la pdiang ïa kane ka rynsan ïakura da ka Ri-Bhoi Boxing Association ha kaba yn ïatrei lang bad ka Meghalaya Boxing Association (MBA) hapoh ka jingïalam u Bah Cornelius Kharhunai kum u President.
Haba ïakren bad ki nongthoh khubor ha ka sngi Palei, u Bah Cornelius uba long ruh u President ka Ri-Bhoi Boxing Association, u la ïathuh ba ha kane ka kynti kaba mynta, kin don saw tylli ki Jylla ki ban wan ban ïashim bynta sha kane ka rynsan ïakob kiba kynthup ïa ka Sikkim, West Bengal, Assam bad ka Meghalaya, kaba pynlong ïa kane ka rynsan ïakura.
Kumba ka Jylla ka la khur ïa ar tylli ki takma ksiar bad 5 tylli ki takma rupa ha u snem ba la dep, hynrei na ka liang u Technical Director ka MBA bad uba long ruh u Joint Secretary ka Boxing Federation of India (BFI), Bah Larry Kharpran u la khmih ba ha kane ka kynti kaba mynta kan Jylla kan khur kham bun ki takma.
U Bah Kharpran u la pynpaw ruh ka jingsngewkmen ban pyntip sha ki paidbah ba kane ka dei ka sien kaba ar ban wanrah biang ïa kane ka rynsan ïakura hapoh ka Jylla.
Ha kane ka kynti kaba mynta, kin don haduh 9 tylli ki kyrdan ïakob (weight category), kita ka 48Kg, 51Kg, 54kg, 57kg, 60kg, 63.5kg, 67, 71Kg bad 75Kg.
Nalor katta, u Bah Larry u la pyntip ba ha kane ka kynti kaba mynta, ka MBA ka la pynlong ïa ka prokram jied nongïakura naduh 2 tarik bad ka ban kut haduh 4 tarik mynta u bnai khnang banjied ïa la ki jong ki samla ïakura ki ban khreh ban kiew rynsan bad ban aireng ha kane ka jingïakob. Hadien ba ki la shah jied, na ka liang ka MBA kan bteng pat ha ka ban pynlong sa ka prokram ai jinghikai (coaching) ka ban neh haduh ka 15 tarik mynta u bnai.
Khnang ban pynlong ïa kane ka rynsan ïakura kaba ïaid beitïaid ryntih, u Bah Larry u la ïathuh ba na ka liang ka Ri-Bhoi Boxing Association ryngkat ka Meghalaya Boxing Association, ki la dep leit ïakynduh ruh ïa u Myntri ba dei khmih ïa ka tnat Sports & Youth Affairs u Bah Shakliar Warjri ha kaba ki la ïoh ban ïakren ha kaba ïadei ba ki jingdonkam ban ïarap pisa lyngba ka Sorkar Jylla namar ka jingpynlut ha kane ka rynsan ïakura kan kot kumba T. 8 lak tam bad ki nongwan ïashim bynta baroh kin long 36 ngut.
Na ka liang ka MBA ka la don jingthmu ba kan ïoh ban siew 8 haduh 9 ngut ki rangïakura ban kiew rynsan ban aireng ha kane ka rynsan ïakura khnang ba ki samla ka Jylla kin ïalehkai bha. Kum ban pynkynmaw ha ka East Zone kaba la dep, ka jylla ka la ïoh ba khur 2 tylli ki takma ksiar lem bad 5 tylli ki takma rupa.
Nalor u President bad u Bah Larry, la ïadon lang ruh u Bah Dondor Marweiñ bad u Bah Daniel Marbaniang kiba long Secretary bad Treasurer jong ka MBA, u Bah Teibor Pathaw bad u Bah Roges Synrem.
