Shillong, Nailar 03:
Ka jingïaid lynti ka Germany ha ka Women’s World Cup ha ka sngi Palei ka la poi sha kaba kut ha ka sien kaba nyngkong eh hadien ba ïakhaid mar 1-1 kol bad ka South Korea.
Kane ka jingïakhaid ka la long pat ka jingplie lad ïa ka Morocco ban jam sha ka pre-quarter final ha ka sien kaba nyngkong eh.
Kham hashwa ka Morocco ka la lah ban pynliem noh ïa ka Colombia da 1-0 kol ha Perth na ka bynta ban pynlong ïa kane ka kynhun ban kamai 6 point bad ïasoh lang bad katei ka kynhun na South America ha ka Group-H. Te kumta ka Germany ka la wan ha ka kyrdan balai ryngkat ki 4 point bad ka la hap ban leit phai noh sha ka ïing.
Wat la ka la khur ïa ka nam lahduh ha u 2003 bad 2007, ka Germany ka la wan sha kane ka lympung kaba la long ka Australia kum kawei na ki kynhun ba khlaiñ bor, hadien ba ka la ïoh rung sha ka final ha ka European Championship jong u snem ba la dep.
Wat la ka la thikna ba lada ka jop ïa ka South Korea kan long ka jingplie lad ba kan ïoh rung sha ka pre-quarter final, hynrei ka jingshah rem noh ha ka jingïalehkai kaba nyngkong ka la long ka jingkhang lad ïa ka ban jam sha kawei pat ka wat jingïakhun
Haba phai sha ka jingïalehkai la ong ba ka South Korea ka la ïoh ban pynkhih jar nyngkong eh lyngba ka Cho So-hyun ha ka minit kaba 6, hynrei shwa ban kut ka jingïalehkai jong ka kylla step ka Alexandra Popp ka la lah ban pynïakhaid kylla na ka bynta ka Germany.
