Ka Meghalaya Lokayukta ha u bnai Jymmang mynta u snem, ka la mudui pyrshah ïa ki 10 ngut ki MDC barim ka Garo Hills Autonomous District Council (GHADC) halor ki kam bamsap bad jingpyndonkam bakla ïa ka pisa katkum ki kyndon 7 bad 12 jong ka aiñ Prevention of Corruption Act, 1988. Katba ha ka 28 tarik Naitung, 2023, ka la mudui sa ïa pyrshah 9 ngut ki MDC barim jong kane ka Council lem bad u Sanjay A Sangma, uba dei u MLA ka NPP bad u kynum trai jong u Myntri Rangbah, Conrad K Sangma nalor uwei pat u kontraktor bad u Secretary ka GHADC hapoh ki kyndon 12 bad 13 jong ka Prevention of Corruption Act, 1988. Hynrei ngi kwah ban kdew hangne ba ïa ka hukum jong ka Meghalaya Lokayukta ba la mih ha u bnai Jymmang 2023 pyrshah ïa ki 10 ngut ki MDC lem bad kiwei pat, la pynsangeh shwa da ka Meghalaya High Court ha u Jylliew 2023.
Ki kyrteng jong kiba la shah mudui ha u Naitung 2023 ki long u Denang T. Sangma, CEM barim ka GHADC, bad ki MDC barim – Augustine R. Marak, Brilliant R. Sangma, Dipul R. Marak, Kurosh M. Marak, Winnison Ch. Marak, Dolly K. Sangma, Bhupen Hajong, bad u Sukaram K. Sangma. Nalor u Sanjay A. Sangma, sa uwei pat u kontraktor uba la shah mudui u dei uba la tip kyrteng kum u Dolrich D. Sangma. U Secretary ka GHADC uba la shah mudui u dei uba la ithuh kum u Hewingson A. Sangma. Ha kawei pat ka liang, ki 13 ngut kiba la shah mudui ha u bnai Jymmang 2023 ki kynthup ïa u CEM barim ka GHADC u Boston R Marak, ki Executive Member barim kiba la tip kyrteng kum u Mark Goera B Marak na ka Batabari konstitwensi, u Winnison Ch Marak na Rongrikimgre konstitwensi, u Jimbert R Marak na Amongpara konstitwensi, u Lovastone T Sangma na Jengjal konstitwensi, u Righteous N Sangma na Babellapara konstitwensi, u Rupert M Sangma na Tura konstitwensi, u Kenedick S Marak na Siju konstitwensi, u Dhormonath Ch. Sangma na Naguapara konstitwensi bad u Ismail Marak na Asanang konstitwensi. Ki arngut ki kontraktor kiba la shah mudui ne ‘chargesheet’ ki long u Kubon Sangma bad u Nikseng Sangma katba u Secretary barim ka GHADC u dei uba la tip kyrteng kum u Hewingson A Sangma. Nangne ngi ïohi ba ki arngut kiba la shah mudui arsien, kata ha u bnai Jymmang bad Naitung, ki long u MDC barim, u Winnison Ch. Marak, bad u Secretary barim ka GHADC, u Hewingson A. Sangma
Ka jingshah mudui jong kitei ki MDC barim, kontraktor bad ki heh ka GHADC ha ka Meghalaya Lokayukta ba la khlieh da u Bah Bhalang Dhar kum u Shongknor, ka pyni ba ka don jingbamsap bamngem bashyrkhei. Kumba ong ka ktien: ym don tdem khlem ka ding, ha kajuh ka rukom, ka Meghalaya Lokayukta kan ym mudui lada kam pat sngew biang ki sabut baroh. Ngi sngewdei ban ai jingïaroh, namarkata, ïa ka Meghalaya Lokayukta kaba la lah ban pyndep ïa la ka kamram hadien ka jingpynlong ïa ki jingtohkit kiba bniah. Ngi dei ruh ban ïaroh ïa kito ki nongmudui pyrshah ïa ki kam bamsap bamngem bad dei lyngba jong ki, ba sa paw ki kam leh be-aiñ kiba la wanrah ïa ka jingpynlehnohei ïa ka pisa paidbah. Nangne shakhmat ngin hap ban ïa peit shaei kine ki jingshah mudui kin poi da ka jingkyrmen ba ka jingbishar kan long kaba kloi, ba ïaid beit, ba khlem shah liang khnang ba ka hok bad jingshisha kin paw.
Ngi sngewdei ban shim ïa kane ka kabu ban kyntu ïa kiwei pat ki nongshong shnong ba kin leit rah ïa ki jingmudui sha ka Meghalaya Lokayukta haba ki shem ba ka don ka jingpyndonkam bakla ïa ka pisa paidbah lane ka jingbamsap bamngem khnang ba yn lah ban tohkit ïa kiba kum kita ki jait kam. Ka Meghalaya Lokayukta ka don la ka jong ka kynhun tohkit lane ka ‘Inquiry Wing’ bad namarkata, ka lait na ka jingtohkit jong ki pulit ka jylla. Shisien ba kano-kano ka jingtohkit ka long kaba laitluid na ka sorkar, ki jingshisha bunsien ki paw pyrthei lut kumba ki dei ban long bad hangta ka hok bad ka jingshisha ki ïoh ka lad ban ïeng rasong.
Ngi nud ruh ban ong ba lada tohkit lut ïa ki kam bamsap bamngem baroh ha Meghalaya, ngim artatien ba ki ban shah mudui kin kot sha ki hajar ngut. Namarkata, haba don kano kano ka jingleh bakla, jingbym biang bad khamtam eh ka bamsap ka bamngem, ngi dei ban mih shakhmat ban ujor sha ka Meghalaya Lokayukta lane ka Meghalaya High Court. Ngim dei ban tieng ban riej ïa la ka jong ka hok. Ka jingbamsap bamngem ka pynduk ïa ka jylla, bad ngim dei ban klet ba dang shen, ka jylla jong ngi ka la wan ha ka kyrdan ba lai napdeng ki jylla baduk tasam ha ka Ri India baroh kawei. Kawei na ki daw bah daw san jong kane ka jingduk tasam ka dei ka jingbamsap namar ka klun lut noh ïa ka hok jong ki nongshong shnong bad ka wanrah ïa ka jingbym ïa biang shuh ha ka rukom im ha kaba uba riewspah u nang riewspah bad uba duk u nang jynjar trah.
