Ottawa, Nailar:
Katkum ki khubor la ong ba u Myntri Rangbahduh jong ka Canada, u Justin Trudeau lem bad ka kurim ka Sophie Gregoire Trudeau, khlem poi pyrkhat ha ka Sngi Balang ki la pynbna ia ka jingthmu ban shong khlad noh. Kane kan long ka jingpynkut noh ia ka jing-iadei ba 18 snem hapdeng kitei ki shijur naduh ba ki la iathoh shong kurim.
U Trudeau u la don 51 snem ka rta ha kane ka por bad ka Gregoire pat ka la don 48 snem ka rta. Kine ki shijur ki la iathoh shongkurim ha u Jymmang jong u snem 2005. Hadien 10 snem ba la shongkurim, u Trudeau u la ioh long u Myntri Rangbahduh jong ka ri Canada bad kane ka la nang pynbna ia ka nam jong kitei ki shijur khamtam ha ka pyrthei Social Media ha kine ki sngi.
U kpa jong u Justin Trudeau, u Pierre Elliott Trudeau ruh u la ioh bat ia ka shuki Myntri Rangbahduh jong ka Canada haduh 15 snem bad u long tang u nonghikai skul ha ki snem shuwa ba un leit pyniasoh ialade sha ka kam saiñ pyrthei.
Ka Gregoire Trudeau pat ka long ka nongthoh khubor pynbyrngia bad ka la ia ithuh- ithaw bad u Trudeau naduh ka por ba dang khynnah. Kine ki shijur ki don 3 ngut ki khun- 2 ngut ki shynrang bad kawei ka kynthei, kiba kynthup ia ka Ella Grace 14 snem ka rta, u Zavier (15 snem) bad u Hadrien uba dang 9 snem ka rta.
Baroh shi katta kine ki shi iing ki ju pyni ia ka jingia ieid bad ka jingia tylli bad kam ju don kano- kano ka kynrum- kynram hapdeng jong ki.
