Jowai, Nailar 03:
Ka 7 Wasa United bad ka FAM ki la buh jaka ïalade sha ka jingïakhun quarter-final jong ka lympung ïalehkai Independence Day Cup Under-17 Football Tournament ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka 7 Wasa United bad ka FAM ki la khur ïa ka jingjop ha ka jingïakhun pre-quarter final kaba la long ha madan Kiang Nangbah Stadium Jowai ha ka sngi Palei.
Ha ka jingïakhun kaba nyngkong, ka 7 Wasa United ka la pynliem noh ïa ka Khimusniang da 2-0 kol. Kane ka la wan lyngba ka kol u Kerlangmi Kelphung uba la ïoh ban thep ha ka minit kaba 36 bad ïa ka kol ba ar la thep da u Thankyou Mukhim ha ka minit kaba 53.
Haba phai sha kawei pat ka jingïakhun kaba bud, ka FAM ka la lah ban pynliem ïa ka Mynthong da 2-0 kol. Haba phai sha kane ka jingïalehkai, ka FAM ka la ïoh ban pynkhih jar nyngkong eh lyngba u Leikirang Suiam ha ka minit kaba 9 bad ïa kawei pat la thep da u Pynsngatnmiki Papang ha ka minit kaba 54.
