Singapore, Nailar:
Ka Singapore ha ka Sngi Palei, ka la pynbna halor ka jingsdien phasi ia uwei u samla 39 snem ka rta, uba la shah kem naduh ki por ba la leit halor ka jingdon kti ban khaïi drok hapoh jong katei ka nongbah.
Ia utei u briew la ithuh kum u Mohamed Shalleh Adul Latiff bad la rai pyniap ia u haba iadei bad ka jingioh kurup ia 55 gram u drok ‘Heroin’ na ka jingdon jong u ha ka jingkhynra ba la ioh bat ia u ha u snem 2019.
Ka Central Narcotics Bureau (CNB) ka la ong ba ia katei ka jingpynkheiñ aiñ jong utei u briew, la pyndep ia ka jingpynshitom ha ka Sngi Palei, katkum ba la shim rai da ka ïingbishar.
Katkum ki kaiphod ba la ioh lum da ka ïingbishar, u Mohamed Shalleh u ju trei kum u nongkhaïi drok uba ju leit pynpoi ia utei u mar sha kylleng ki bynta jong ka nongbah hashwa ban ioh kem noh ia u ha u snem 2016. Ha ka por ba la ioh bat ia u, u la iathuh ha ki pulit ba u mut ban leit rah ia kitei ki cigarette sha uwei u paralok uba u pynsah pisa.
U Mohamed Shalleh u la long ruh u nongshah phasi ba 16 naduh ba ka sorkar ka la shim ia kane ka sien jam hadien ki por jong ka khlam Covid.
Kane ka jingshah phasi ka long ruh tang hadien kumba shih taiew eiei ba ka Singapore ka la sdien phasi ia kawei ka kynthei hadien 20 snem ba la kem ia ka halor ki jingdon kti ha ki kam khaïi drok.
Ka Saridewi Binte Djamani, 45 snem ka rta, kaba long ka nongshong shnong ka Singapore, ka la shah sdien phasi ha ka Sngi Thohdieng jong ka taiew ba la leit namar ka jingdon kti jong ka ha ka jingkhaii ia u drok ba 30 gram ha ki por ba la leit.
Kumjuh ruh ha ki 2 sngi shuwa ban phasi ia katei ka briew, uwei u briew ba la tip kyrteng u Mohd Aziz bin Hussain, 57 snem ka rta, u la shah sdien phasi halor ka jingkhaii ia u drok ba 50 gram.
Na ka liang jong ka United Nations, ka la pynpaw ka jingpyrshah kaba jur halor ka jingshim rai bad ka rukom pynshitom jong ka Singapore ia ki nongleh pynkheiñ aiñ bad kumta ruh ka la kyntu ia ki bor pyniaid ka Singapore ban pynsangeh noh ia katei ka jait jing pynshitom khamtam ha ki liang ki bym pat da iahap than eh.
Hynrei la ong ba wat hapdeng ka jingpyrshah jong ka United Nations bad kumjuh ruh na kiwei pat ki bor ba nabar, ka Singapore ka ngeit ba ka jingsdien phasi ka long ka jingsneng kaba biang tam ia kito ki nongkhaïi droks hapoh ka ri bad la leh khnang ia kane ruh ban tehlakam ia ka jingjur ki kam khaïi droks hapoh ka ri.
