Washington, Nailar:
Kawei ka nong America ka la shah kem noh ha ki pulit hadien ba la lap ia ka jingiadon kti jongka ha ka jingshah pyniap u kurim jongka ha ki por ba la leit.
Katkum ki kaiphod ba la ioh lum da ka ïingbishar, la ong ba katei ka briew kaba la tip kyrteng kum ka Lindsay Shiver 36 snem ka rta bad kaba long ka nongshong shnong jong ka nongbah Georgia, ka iadon bynta lang bad ki nong Bahamas ha ka jingiasuh buit ban pyniap ia u kurim jongka. Kitei ki 2 ngut ki nong Bahamas kiba iadon kti lang bad ka ki kynthup ia u Terrance Adrian Bethel bad u Farron Newbold Jr. Kine ki long ki briew kiba thmu ban pyniap ia u kurim jongka- u Robert Shiver.
Katkum ki kaiphod ba la ioh lum, la ong ba ka Lindsay ruh ka iadon bynta lang ha ka jing iasuh buit ban pyniap ia u kurim jongka, ha kaba la shem ruh ba kitei baroh ki iadon lang ha Abaco Islands ha ka 16 tarik u Naitung.
Kumta, ia u Bethel bad u Newbold Jr ruh la rah noh da ki pulit naka bynta ki jingtohkit kiba bniah.
Ki pulit ki la kem noh ia ka Lindsay hadien ba ki la ioh ban tohkit ia kitei ki 2 ngut bad la ioh jingtip ruh ba ym tang kitei ki 2 ngut kiba iadon bynta ha ka jingpyniap ia u Mr.Shiver hynrei wat ka kurim jong u ruh ka iadon bynta lang bad kane ka la jia hadien ka jingpynkhreh jong kitei ki shijur ban iaphet lok noh.
U Robert Shiver u la soi ia ka jingiakut ban iaphet lok noh bad ka Lindsay ha ka 5 tarik u Iaiong jong une u snem 2023 namar ka jingbym iabeit bad jingbym iasngewthuh jingmut hapdeng jong u bad ka kurim jong u.
