Shillong, Nailar 03:
U Clifford Miranda ha ka sngi Palei u la shah thung kum u Coach ki rangïalehkai U-23 ka ri ha ka All India Football Federation (AIFF).
Ryngkat bad u, ka technical committee jong ka AIFF ka la mynjur ruh ban kynthup lang ïa u Nallappan Mohanraj kum u assistant coach, u Raghuvir Khanwalkar kum u goalkeeping coach bad u Elias Araujo kum u fitness coach.
Ha kane kajuh hi ka sngi, ka AIFF ka la pyllait ruh ïa ka thup kyrteng jong 28 ngut ki rangïalehkai ki ban ïadon bynta ha ka jingpynkhreh na ka bynta ka AFC U-23 Asian Cup Qatar Qualifiers.
Ïa ka jingïalang jong ka technical committee, kaba la shim ïa kane ka rai lyngba ka video conference bad la pynïaid da u khlur ïalehkai phutbol barim ka ri u IM Vijayan.
Kiwei kiba la ïadon lang ki long u Pinky Bompal Magar, Harjinder Singh, Arun Malhotra, Climax Lawrence, Bah Eugeneson Lyngdoh bad u Syed Shabir Pasha, kiba la shakri ia ka kam kum ki technical director jong ka AIFF.
U Miranda u la ïoh ban shimti ïa kane ka kam kaba thymmai kum u coach hadien ba u la ïoh ban mihkhmat ïa ka ri India na ka bynta ki khyndai snem naduh u 2005 haduh u 2014. Ha ka por ba u dangïalehkai na ka bynta ka ri India, u la lah ban pynurlong na ka bynta ban khur jingjop ar sien ha ka SAFF Championships, ar sien ki nam lahduh ha ka Nehru Cup bad ka AFC Challenge Cup.
Ha ka por ba u dang ïalehkai na ki klob, u Miranda u la long u khlur ïalehkai ba kynsai na ka bynta ban pynlong ïa ka Dempo SC ban khur ïa ka nam lahduh haduh san sien ha ka I-League.
“Ngi ai khublei ïa u Clifford halor ka jingshah jied kum u coach ka kynhun ki rangïalehkai U-23 jong ka ri, ha kaba kan ïakhun ïa ka AFC U-23 Asian Cup Qualifiers ha China,” la ong u secretary general ka AIFF u Dr Shaji Prabhakaran ha ka kyrwoh.
“U Clifford u la lah ban pynurlong Odisha FC ban khur jingjop ha ka Super Cup, bad nga thikna ba un lah ban pynurlong ïa ki jingkhmih lynti jong ngi na ka bynta ka kynhun ïalehkai ka ri,” la ong u Prabhakaran.
Kane ka AFC U-23 Asian Cup Qatar 2024 Qualifiers, kan sdang naduh 6 haduh 12 tarik u Nailur ha Dalian, China bad katei ka lympung ka dei ka jingïaknieh jong ka kynhun ki rangïalehkai na ka bynta ka Olympic ka ban sa long ha Paris ha u snem ban wan.
Katei ka kynhun sdang ïa ka prokram kilanmet ha Bhubaneswar naduh 12 tarik mynta u bnai. Ka India kan hap ban ïakhun pyrshah ïa ka China, Maldives bad ka UAE kiba don ha ka Group-G.
Ki kyrteng ki rangïalehkai ki long:
Goalkeeper: Sachin Suresh, Hrithik Tiwari, Prabhsukhan Singh Gill & Arsh Anwer Shaikh.
Defender: Narender Gahlot, Hormipam Ruivah, Bikash Yumnam, Halen Nongtdu, Sanjeev Stalin, Sumit Rathi, Jitendra Singh & Abdul Rabeeh.
Midfielder: Thoiba Singh Moirangthem, Lalrinliana Hnamte, Jiteshwor Singh Yumkhaibam, Ayush Dev Chhetri, Vibin Mohanan, Brison Deuben Fernandes & Amarjit Singh Kiyam.
Forward: Sourav K, Vikram Partap Singh, Parthib Gogoi, Rohit Danu, Ninthoinganba Meetei Khumanthem, Gurkirat Singh, Ayush Chhikara, Sivasakthi Narayanan &Suhail Ahmad Bhat.
