Shillong, Nailar 03:
Ka Lorenza Songthiang ka la long ka ’thei ïalehkai kaba nyngkong eh na ka Jylla ba kan mihkhmat ïa ka ri India sha ka World Combat Games ka ban long ha Riyadh, Saudi Arabia ka ban long ha u bnai Risaw mynta u snem.
Kane ka ’thei ïalehkai kaba dei ka khun jong u Bah Donny Ranee bad Kong Anita Songthiang kiba sah ha Laitkor (Kynton U Mon), kan mih na ka nongbah ha ka sngi Thohdieng ban leit sha Thailand na ka bynta ban shah hikai pyntbit ha shwa ban kan leit ïa aireng sha Riyadh.
“Ka World Combat Games ka dei kaba la ïoh jingithuh na ka International Olympic Committee. Kane ka jingïoh ïa ka lad ka dei lyngba ka jingplie lad i Pa (Bah Donny) iba la btin lynti ïa nga naduh ba nga dangrit bad haduh kane ka rta,” la pynpaw kane ka ’thei ïalehkai Martial Arts ka Jylla ha ki lad pathai khubor ha ka sngi Palei.
Kane ka ’thei ïalehkai ka la wanrah nam ïa ka ri India da kaba khur takma rnong ha ka World Championship kaba la long ha u Ïaïong ha Uzbekistan.
Ha ka Kickboxing, ka Lorenza ka la khur ïa ka takma rnong ha ka Asian Championship 2022 kaba la long ha Thailand bad ha ka Jeet Kune Do kaba long ha Sri Lanka ka la khur ïa ka takma ksiar.
