C. B. Iawphniaw
Ha ka saiñ pyrthei lada ngi kynnoh bym ler trei kam ïa kiwei ka long ka kam bym lah thaw pyrthei. Kane ka dei ka jingleh politic hapdeng ki seng saiñ pyrthei ba phah leit rah placard bad tem tin ha ki ïing ki nongmih khmat ka wanrah pynban ka jingïashun ïa pen bad ka bishni ka pihuiñ hapdeng kawei ka seng san pyrthei na kiwei pat. Kum kane ka rukom kam dei ban jia ïa ki nongmihkhmat ba la jied da u paidbah jong kano kano ka constituency. U paidbah um dei ban leh shongshit bad ïa shah ïa kano kano ka seng saiñ hima sima khlem da wad ïa ka jingshisha. U paidbah u dei ban sian kum u bseiñ bad jemnud kum ka paro kumba ong, mano re, khnang ban ym mih kano kano kaba sniew bad ban ym pynmong ïano ïano tang na ka bynta ka jingmyntoi ka saiñ hima sima jong ki. Namar uno uno u nongmihkhmat ba la shah jied ha u paidbah u dei hok ban long kum u nongïalam uba shaniah bad uba dei peit ïa ka roi ka par bad ka bha ka miat ka constituency bad ka Jylla hi baroh kawei. Ym dei ba ngin kren beiñ kren khoh ïano ïano kum ïa uba la leh ki kam sniew kam smeh.
