Shillong, Nailar 04:
U Manager jong ka Manchester City u Pep Guardiola u la ong ba ka Arsenal ka kham don kabu bad long hakhmat ban ïa ka Manchester City ha ka jingïakhun pyrshah ha ka jingïaknieh ïa ka Community Shield.
U Pep u la ong ba kumba ka long, ka Manchester City ka la pyndep slem ïa ka aiom ïalehkai namar hadien ka lympung Premier League, ka la hap ban ïakhun ruh ïa ka FA Cup bad ka Champions League.
Kumta ki rangïalehkai ka City kim shym la ïoh ka por kaba biang ban pynjah thait ïa la ka met. Pynban ha kawei pat ka liang, ka long shisha pat kaba jop na ka bynta ka jong ki, kiba la rah syndon ïa ki lai tylli ki nam lahduh bah eh jong ka dewbah Europe, la ong u Guardiola, ha kaba u la ong ruh ba ka Arsenal ka la hap tang ban ïakhun ha ka Premier League.
“Ka jinglong jingman ha kaba ngi don mynta, ka long ba ngi la pyndep ar taiew kham hadien ban ïa ka Arsenal bad kumjuh ruh ban sdang ar taiew shwa ïa ka Arsenal ha kane ka aiom ba mynta, kumta ngim da don eh ha ka lynti kaba biang bad paka,” la ong u Pep.
“Watla ngi mad jingeh ha kaba sdang jong manla ka aiom hynrei kam pher namar katba dang ïaid ngi dang lah ban kiew bad nga kyrmen ruh ba kane ka rukom kan ïarap ïa ngi ban don ha kato ka kyrdan bad ban ïakhun,” u la ong.
Kumba ka long mynta, ka Arsenal ruh ka dang ïaleh ban pynkhlaiñ ïa la ka kynhun bad da ka jingsoi ïa u rangïalehkai pdeng ka England u Declan Rice na ka West Ham United, u Kai Havertz na ka Chelsea bad u Jurrien Timber na ka Ajax Amsterdam, ka la nang pynkhlaiñ ïa ka kynhun ban ïakhun biang ha kane ka aiom kaba thymmai.
