Jowai, Nailar 04:
Ka Kseh Sylle Ialong Sports Club bad ka Madankynsaw Mookyndeng Sports Club ki la bteng ban khur ïa ka jingjop ha ka lympung ïalehkai 3rd Division Football Tournament 3rd Adelbert Laloo Memorial Trophy ba la pynïaid da ka West Jaiñtia District Sports Association (WJDSA).
Ïa kane ka lympung ïalehkai la pynlong ha madan ïalehkai jong ka Kiang Nangbah Stadium Ladthadlaboh, Jowai ha ka sngi Thohdieng.
Ha ka jingïakhun kaba nyngkong jong kane ka sngi, ka Kseh Sylle Ialong ka la lah ban pynliem noh ïa ka Tympang Sports Club da 2-1 kol. Ïa ki kol jong ka Kseh Sylle Ialong la ïoh ban khyrwit da u Wanbiang Suchiang ha ka minit kaba 3 bad u Niawki Phawa ha ka minit kaba 70+1. Katba ïa ka shi kol jong ka Tympang la thep da u Niwan oo Lamare ha ka minit kaba 49.
Haba phai pat sha ka jingïakhun kaba bud, ka Madankynsaw Mawkyndeng ka la lah ban pynliem noh ïa ka Mookaswan Dongwah da 2-0 kol, bad ïa kine ki kol la ïoh ban thep da u Chareson Tyngkan ha ka minit kaba 32 bad u Dangri Phawa ha ka minit kaba 68.
