Shillong, Nailar 04:
Ka shi kol ba la ïoh ban khyrwit da u Cristiano Ronaldo ka la pynlong ïa ka Al-Nassr ban ïoh buh jaka ïalade sha ka quarter-final jong ka lympung Arab Club Cham-pions Cup.
Kane ka kol kaba la ïoh ban thep da u Cristiano Ronaldo ka la dei ha ki minit shwa ban wai ka jingïalehkai kaba la lah ban pynïakhaid ïa ka jingïalehkai ha ka jingïakhun pyrshah ïa ka Zamalek ka club na Egypt.
Haba phai sha ka jingïalehkai, ka Al-Nassr ka la lap ïa lade shadien ha ka jingïalehkai kaba la long ha King Fafd Stadium ha Ta’if, Saudi Arabia, hadien ba ka Zamalek lyngba u Zizo ka la ïoh ïa ka kol ba nyngkong ba la shut da ka penalty.
Saw minit shwa ban wai ka jingïalehkai, u Ronaldo ba la 38 snem ka rta, sa shisien u la lah ban pynpaw ïa ka jingtbit ka jong u, khamtam lei haba pyndei da ka khlieh ïa ka bol ban pynrung kol, ha kaba u la kynthih shajrong bha ban lah ban pyndei da ka khlieh ïa ka bol kaba la rung jlang shapho ka kol, ha kaba u nongap kol ka Zamalek u Mohamed Sobhi um shym la lah ban leh eiei.
Kane kan dei ka kol kaba ar jong u Ronaldo ha kane ka lympung, kata hadien ba u la ïoh ban khyrwit ïa kawei pat ka kol ha ka jingjop da 4-1 kol pyrshah ïa ka Al-Monastir ka club na Tunisia.
Ha katei ka jingïa-lehkai pyrshah ïa ka Zamalek, la sakhi ruh ïa ka jingmih madan ha ka sien ba nyngkong jong u Sadio Mane, uba la pynïasoh sha kane ka club na ka Bayern Munich.
