Shillong, Nailar 04:
Ka jingkhynra ba la pynlong da ki pulit ka Umkiang, East Jaiñtia Hills bad ki BSF ka la ïalam sha ka jingïoh kurup ïa san tylli ki thuk-thuk kiba dei kiba shu tuh da ki runar. Na kine ki san tylli ki thuk-thuk, saw tylli ki dei ki Bajaj Pulsar bad kawei ka Royal Enfield Bullet.
Katkum ka khubor ba la ïohlum, ha ka 3 tarik Nalar, 2023, ki BSF ki la ïoh jingtip ba ki don ki runar kiba donkti ban die be-aiñ ïa ki thuk-thuk kiba la shu tuh na India sha Bangladesh.
Hadien ba la ïoh ïa katei ka jingtip, ki BSF bad ki pulit Umkiang ki la pynlong ïa ka jingkhynra bad ki la lap ïa san tylli ki thuk-thuk ba la pynïeng ha kawei ka madan kaba don hajan ka ïew ha Umkiang harud ka surokbah NH-6.
Ka khubor ka ïathuh ba kitei san tylli ki thuk-thuk ki shongdor haduh T.5,20,000 eiei.
Hynrei ym shym la ïoh kem ïano-ïano ha kaba ïadei bad katei ka jingthmu ban die ïa ki thuk-thuk ba shu tuh na India sha Bangladesh. Kat haduh mynta ka jingtohkit ka dang ïaid ban ithuh ïa kiba donkti.
