Beirut, Nailar:
Ka Lebanon ha ka Sngi Thohdieng ka la pynkynmaw biang ia ka jingjia ba la jia ha ki 3 snem ba la leit naduh ba jia ka jingbthei ha Beirut. Hynrei tat haduh kine ki sngi, ym pat shym la don ba shah kem ne ba shah pynngat kyndon eiei halor ka jingdon kti ha katei ka kam thombor namar ki bor ba dei khmih ki la pynsangeh ia ka jingwad bniah haba iadei bad katei ka jingjia.
Ha ka 4 tarik u Nailar jong u snem 2020, ka la don ka jingbthei kaba heh bha hapoh Beirut bad kaba la pynjulor bun bha ia katei ka nongbah, ha kaba palat 220 ngut ki briew ki la duh ei la ka jingim bad kumba 6,500 tam kiba la ngat bad mynsaw ha katei ka por.
Hynrei ki bor pyniaid katei ka nongbah ki la iathuh ba ka daw jong katei ka jingbthei ka long na ka jingkem ding ha kawei na ki jaka ba buh ia ki kynja dawai bad kynja makhor ha katei ka nongbah.
Kawei na ki longiing jong kito kiba khlad ha katei ka jingjia, ka la mih shakhmat ban ïakhih paidbah ha u Lber ban dawa ia ki bor pyniaid ban wad bniah bad ban kem ia kito kiba don kti ha katei ka kam bad kito kiba leh torti ha ka jaka ba buh ia kitei ki jait tiar kiba ap jingma ia ki paidbah.
Kumjuh ruh ha ka Sngi Thohdieng, kawei na kitei ki kynhun ba la wanrah ia ka jingiakhih ha utei u snem, ka la ong ba kane ka long ka sngi ha kaba 3 snem mynshwa ki bahaiing- hasem jong kito kiba khlad ha katei ka jingjia, ki mad ia ka jingsngewsih kthang bad u lyoh uba dum u la wan ban tap ia ka jingim jongki ha katei ka por hynrei wat haduh kine ki sngi ba mynta, ym shym la don ba shah pynngat kyndon ne shah kem haba iadei bad katei ka jingjia.
Namar kumba la sakhi, ba ka ïingbishar ka la sngap jar bad ka hok ka la shu shah tep khlem im khlem kano- kano ka jing seisoh watla kiba bun ki paidbah ki la mih shakhmat ha katei ka por ban ïakhih naka bynta ka hok jong kito kiba khlad ba ki dei ban ioh ia ka hok da kaba thwet bad pynshitom ia kiba don kti ha katei ka kam.
Katei ka jingbthei, la ong ba ka long kawei na ki jingeh ba khraw bah ba ka ri ka hap ban mad ha utei u snem, naba wat da ka World Bank ruh ka la pynpaw ia ka jingsngewkhia kaba jur halor ka jingduh nong bad ki jing julor na katei ka jingjia.
Ha u Nohprah jong u snem 2020, u heh ka kynhun wad bniah- u Fadi Sawan u la sei ia ki katto katne ki nongialam ka ri kiba iadon bynta ha ka jingkhmih bad jingpyniaid ia katei ka kam. Hynrei hadien ba la mih pat ka jingpyrshah na ki Myntri sorkar bad na ki seng saiñ pyrthei, u Sawan u la shah pynkynriah noh na katei ka mat hapdeng ka jingiatai hakhmat ka ïingbishar. Naduh katei ka por ba la weng noh ia u Sawan na katei ka bynta, ym shym don shuh ki ban tih bniah ne ban wad ia ka hok halor katei ka jingjia namar ka jingpyrshah jong kiba bun ki kynhun.
