Moscow, Nailar:
Katkum ki khubor la ong ba u nongialam jong ka liang pyrshah ka Russia- u Alexei Navalny, u lah ban shah set patok sa kumba 20 snem eiei haba iadei bad ka jingleh pyrshah jong u bad ki nongbud jong u ia ki rai bad rukom treikam jong ka sorkar Russia.
U Navalny u la don 47 snem ka rta bad u long u nongpyrshah lane u nongïaleh pyrshah ba hakhmat jong u President ka Russia- u Vladimir Putin bad ia mynta hi, u Navalny u dang hap hapoh ki rai ba la dep shim da ka ïingbishar ha kaba sdang ba yn set patok ia u da kumba 11 ne 12 snem kynthih, haba iadei bad ki jingleh pyrshah jong u ia ka sorkar bad ia ka seng jong u la shah kheiñ kum kawei na ki kynhun lehnoh namar jong ki 6 tylli ki kyndon pynkheiñ aiñ ba la pynngat pyrshah ia u haba iadei bad ka jingleh ia ki kam be-aiñ bad ka jing wanrah ia ki kam thombor bad kumjuh ruh ka jingialam bad jingseng ia ka kynhun ba shyrkhei ha ki por ba la leit.
Kumta, ki bor pyniaid bad ki nongthaw aiñ ka Russia ki khmih lynti ba ka ïingbishar kan pynkiew ia ka por shong patok jong u sha ka 20 snem tam, khnang ba kan long ruh kum ka jingmaham bad ka jingpyni nuksa ia kino- kino ki runar lane ki kynhun runar kiba thmu ban wanrah ia ki kam thombor bad ban ialeh pyrshah ia ka sorkar.
U Navalny, ha ki snem 2010, u la ialam ia ki phew hajar ngut ki paidbah sha ki surok ban ialeh pyrshah ia ka sorkar bad u la shah kem noh ha u Kyllalyngkot jong u snem 2021 hadien ba u wanphai na Germany sha ka nongbah Moscow jong ka Russia.
Ka Russia ka la pharep ba u Navalny u iadon kti bad ki bor ba nabar ha ka jingsyntiat ia ka Russia bad ban shet kylla ia la ka jong ka ri bad kumta ruh ka Russia ka dei hok ban pynshitom ia u bad um lah lait na ki jing pynshitom katkum ka jingleh pynkheiñ aiñ jong u.
