Los Angeles, Nailar:
Ha kane ka khubor, la ong ba 6 ngut ki heh pulit doh-lieh, ki la phla bad pdiang halor ka jingdon kti ban pynshitom beiñ ia 2 ngut ki doh-iong da kaba leh khlem akor bad kumjuh ruh da kaba pyndonkam da ki tiar kiba kynthup ia ka waitlam. Katei ka jingpyni bor jong kitei pulit ia kitei ki doh- iong ka long haduh kumba 1 kynta eiei, haduh ba kan da poi sha u pud ba uwei na kitei ki doh iong u la shah siat na ki bynta jong ka ktien bad u ryndang.
Katba, ia utei uwei pat u doh iong, kitei ki pulit doh lieh ki la shoh bad pyn mynsaw ha ryngkat ki jing byrngem ba um dei ban iathuh ia kaei kaba jia baroh.
Kumta, ki bor ba halor ki la ong ba kane ka jingjia ka long kawei na ki ban pynjah burom ia ka ri baroh kawei namar kitei ki heh pulit, tang namar ba ki dei ki doh lieh, ki nud ban pynshitom beiñ bad ban pyni bor ia kiwei pat ki jait bynriew khamtam ia ki doh iong bad kane hi ka pynpaw shai ia ka jinglong shukor jongki ba, ha ka jaka ba kin iada ia ki riew paidbah kumba ki la smai ha ka por ba ki pyniasoh sha ka kam, hynrei ki pyndonkam bakla pynban ia ka bor da kaba wanrah jingma ia ki paidbah.
Hynrei kiba kum kine ki jingjia, la ong ba kim long shuh kiba sngew pher haduh katta. Namar ki doh lieh ki ju pyni bor ia ki doh iong bad ki ju ñiew beiñ ruh ia ki doh iong ha kiba bun ki liang.
Hynrei haba ka aiñ jong ka ri, ka lap ia kum kitei ki jingleh bad ki jingjia leh ibeiñ jait bynriew, kam ju ailad bad ka pynshitom bad pynngat kyndon pynkheiñ aiñ ruh ia kita kiba don kti.
