Lebanon, Nailar:
Ka Islamic State (IS) ha ka Sngi Palei ka la pynbna halor ka jingiap u nongialam katei ka kynhun- u Abu al-Hussein al Husseini al-Qurashi, uba la khlad hapdeng ka jing-iakynad ha ka thaiñ Northwest jong ka Syria.
Katkum ka jingpynbna na katei ka kynhun Islamic State, la ong ba utei u nongialam jong ki u la kyllon iap hapdeng ka jingïakynad bad ki kynhun Hayat Tahrir al-Sham ha ka thaiñ Idlib. Hynrei ki dkhot jong katei ka kynhun kim shym la pynshai pat ha kano ka por bad ha kano ka rukom utei u nongialam jong ki u iap ha katei ka jingjia.
Hynrei ki la pynbna pat ba ki la thung ia u nongialam ba thymmai jong ka seng bad ka seng mynta kan hap hapoh ka jingialam jong u Abi Hafsan al-Hashimi al-Qurashi.
Hadien ba ka kynhun IS ka la sdang ban khlaiñ bor ha Iraq bad Syria ha u snem 2014, la iohi pat ia ka jinghiar jong katei ka kynhun ha kine ki sngi ha ka jing iakynduh bad kiwei pat ki kynhun lehnoh kiba kham khlaiñ bor ban ia ka.
Ka kynhun lehnoh Sunni Muslim ruh ka dei kaba la pynpaw bha ia ki kam thombor jongka da kaba khrai khlieh bad ka jingleit thombor ha ki jaka paidbah ha ki por ba la leit.
Hynrei ka la shah rem noh ha Iraq ha u snem 2017 bad kumjuh ruh ha Syria ha ki 2 snem ba bud, hynrei katei ka kynhun ka dang iai wanrah hi ia ki kam thombor ha kitei ki ri haduh kine ki sngi ba mynta.
Ha u Naiwieng jong u snem ba la leit, ka IS ka la pynbna ba u nongialam barim jongka ruh u Abu Hasan al-Hashimi al-Qurashi u la khlad noh hapdeng ka jingiakhun bad ki kynhun ba mar ialeh pyrshah badki ha katei ka por.
Kumjuh ruh u nonghiar pateng jong utei u nongialam, u Abu Ibrahim al-Qurashi pat u la shah siat iap ha u Rymphang jong u snem ba la lah ha ka jingleit khynra jong ki shipai ka US hapoh ka thaiñ Idlib.
Kumjuh ruh u Caliph ba nyngkong duh jong katei ka kynhun- u Abu Bakr al-Baghdadi, u la shah pyniap ha Idlib hi, ha u Risaw jong u snem 2019.
