Shillong, Nailar 04:
U rangïalehkai kriket ba paw jong ka England u Alex Hales u la pynbna ban shongthait noh na ka jingïalehkai kriket na ka Ri hadien ba u la kynjoh sha ka rta kaba 34.
U Alex Hales uba dei ruh u nongtied, u la ïalehkai haduh 11 tylli ki jingïalehkai Test, 70 tylli ki jingïalehkai one-day international bad 75 tylli ki jingïalehkai Twenty20 na ka bynta ka England, u la shah pynshong noh na ka kynhun ïalehkai ka England kaba la ïashim bynta ha ka ODI World Cup ha u 2019 hadien ka khubor jong ka jinglap ba u pyndonkam drok bad ha kaba u la hap ban shong shabar na ka kynhun haduh lai snem kynthih.
U la shah khot biang sha ka kynhun na ka bynta ka T20 World Cup ha u 2022 ban mih bujli ha ka jaka jong u Jonny Bairstow uba don hapdeng ka jingshitom, ka lympung kaba ka England ka la jop syndon.
“Nga la rai ban shongthait noh na ka jingïa-lehkai na ka bynta jong ka ri. Hooid ka la long shisha ka burom kaba khraw ïa nga ban ïoh mihkhmat ïa la ka jong ka ri,” la ong u Hales.
Shwa kane, u Hales u la shah daiñ kuna bad shah sospon ruh shipor namar ka jingdon bynta ha ka jinglehkmen shabar ryngkat bad u Ben Stokes ha u snem 2017.
