Shillong, Nailar 04:
U rangïalehkai dien ka France u Axel Disasi u la pynïasoh noh ïalade sha ka Chelsea na ka club Monaco ha ka jingsoi kontrak kaba hynriew snem ha ka dor kaba 45m euros (£38.5m).
Ka jingwan jong u Axel Disasi, ba dang 25 snem ka rta, kan pyn-khlaiñ ïa ka bynta ba shadien jong ka Chelsea khamtam lei hadien ka jingdon jong Wesley Fofana hapdeng ka jingshitom ka khohwah.
U Disasi u la ïoh ban mih madan ha baroh ki 38 tylli ki jingïalehkai jong ka Monaco ha ka lympung Ligue 1 ha ka aiom kaba la leit.
“Nga dap da ka jing-sngew sarong ban ïoh long ka bynta jong kane ka ïing kaba khraw bad heh,” la ong u Disasi ha ka website jong ka Chelsea bad bynrap “Nga kyrmen ba ngan lah ban kot sha ka thong kaba heh hangne, kata ban jop ïa ki nam lahduh. Ngan leh lut katba nga lah ban poi sha kita ki thong.”
Ha kajuh ka por na ka liang jong ka Chelsea ka la mynjur ruh ïa ka dor na ka bynta ban wanrah ïa u nongap kol ka Brighton u Robert Sanchez.
U Disasi u la ïoh ïalehkai haduh saw sien na ka bynta ka France, kynthup ka jingïoh mih bujli ha ka lympung 2022 World Cup final ba ka la shah rem ha ka Argentina, bad ruh ban mih madan haduh 129 sien na ka bynta ka Monaco hadien ba u la pynïasoh na ka Stade de Reims ha u Nailar 2020.
U Disasi u la long u rangïalehkai ba hynriew ba ka Chelsea kan soi ha kane ka ïew ïadie ïathied rangïalehkai, kata hadien ka jingthied ïa u Christopher Nkunku, Nicolas Jackson, Lesley Ugochukwu, Angelo Gabriel bad u Diego Moreira, kiba u manager ba thymmai u Mauricio Pochettino u la bteng ban ïaleh ban pynkhlaiñ pura ïa la ka kynhun.
