Beijing, Nailar:
Katkum ki khubor la ong ba ka China ha kane ka kynti, ka la ialeh ban pynduna ia ki jingpyrkhing haba iadei bad ka jingsam ‘Visa’ sha ki nongleit nongwan ba nabar jong ka ri, kum shi bynta ban kyntiew ia ka ioh ka kot hapoh ka ri.
Da kane, ka China ka thmu ban pyllait kylluid ia ki briew, ki kali bad ha kiwei de ki liang khnang ba kan ym pynthud ia ka jingleit- jingwan bad ka jingiadei kam jongki briew bad ka China.
Ka jingshah ktah jur jong ka China ha ka khlam Covid-19, ka la wanrah ia ka jingduh nong kaba khraw ha kiba bun ki liang bad kane ka la tan bad kjit lut ia ka ioh- ka kot jong ka China wat haduh kine ki sngi ba mynta bad kumta la ong ba ka China ka hap ban thaw lad- thaw lynti kumno ban pynkhie im bad ban khyllie biang ia ka ioh- ka kot jongka da ki rukom bapher.
Shuh shuh ruh la ong ba ka GDP jong ka China ka la kiew tang 0.8% ha ka quarter ba ar jong une u snem bad ka jingkyrduh kam- kyrduh jam ki khun samla ka la jur bha bad ka la kiew haduh 20%.
Haba iadei bad kane, ka tnat ba dei khmih ia ka leit- ka wan ha China, ha ka Sngi Palei ka la pynbna ia ki kyndon ba thymmai naduh ka jingpynsting bad jingweng noh ia ki jingpyrkhing ba bun haba iadei bad ka Visa naka bynta ki paidbah nongleit- nongwan sha China.
Kumta, la ong ba ia kito kiba mut ban leit ïashim bynta ha ki kam khaïi- pateng lane kiba don bynta ha ki kam ban kyntiew lang ia ka ioh- ka kot ha China, kin lah ban ioh noh ia ka Visa ha ka por ba ki leit poi ha China hynrei kaba kongsan ka long ba ki dei ban pynbiang ia ki kot- ki sla jingdonkam baroh kumba ju long ka rukom.
Barabor, la ong ba ki nongleit- nongwan sha China ki hap ban applai shuwa ia ka Visa na ka tnat ba dei khmih jong ka China (Chinese Embasy/Consulate) kaba don hapoh ki ri jongki khnang ba kin ioh ban leit rung sha China.
