Shillong, Nailar 04:
U HS Prannoy uba dei u khlur ïalehkai badminton jong ka Ri u la ïoh rung sha ka jingïakhun semi-final jong ka lympung Australian Open Super 500 hadien ba u la lah ban pynliem noh ïa u Anthony Ginting ha ka jingïakhun quarter final.
U Prannoy u la lah ban pynliem noh ïa u Anthony Ginting jong ka Indonesia uba bat ïa ka kyrdan kaba 2 ha ka pyrthei da 16-21, 21-17, 21-14 ha ka jingïalehkai kaba la long ha Sydney.
Ha kane ka jingïalehkai, u Prannoy u la pynpaw ïa ka jingtbit bad jinglong ïai shah ka jong u, kumno ban pynlong ïa u Anthony ba un leh bakla, bad dei halor kane, ba u la lah ban jop ïa kane ka jingïalehkai kaba la neh kumba 73 minit eiei.
Hadien kane ka jingjop, mynta HS u Prannoy un pynkhreh pat ban ïakhun pyrshah sa ïa uwei pat u rangïalehkai ba dang khynnah jong ka India u Priyanshu Rajawat, uba la lah ban pynliem noh ïa uwei pat u khlur ïalehkai badminton ba paw jong ka Ri u Kidambi Srikanth da 21-13, 21-8 point ha ka jingïalehkai kaba la neh tang kumba 30 minit.
