Shillong, Nailar 04:
Ka Royal Challengers Bangalore (RCB) ka la pynbna ba u Andy Flower un mih bujli noh ha ka jaka jong u Sanjay Bangar ban shimti kum u head coach na ka bynta ka aiom ka ban wan.
“Nga dap da ka jing-sngew sarong ban ïasoh bad ka RCB. Nga sngew burom shi katdei eh ban mihkhmat ïa ka club kaba heh bad khraw. Ka RCB ka don ha ka, ïa ki nong-kyrshan kiba khraw bad shongshit bad ki bym ju don nongshun satia. Kumta ngam lah shuh ban ap ban mad ïa kata hapoh ka madan Chinnaswamy ban sakhi ha ka aïom ban wan,” la ong u Andy Flower.
“Nga la ïohi ïa ka kam ba la leh da u Mike Hesson bad u Sanjay Bangar, kiba dei ki ar ngut ki coach, ïa kiba nga burom eh, bad kumta nga phai shakhmat sha kane ka jingïaleh ban ïalam ïa ka RCB sha ka thong kaba heh. Nga sngew kmen ruh shi katdei ban ïoh ïadon lang biang bad u Faf Du plesis.,” u la ong.
U Andy Flower ba la 55 snem ka rta, u dei uba la dep ban coach ruh ïa ki kynhun ïalehkai kriket jong ki Ri bad ki club ha kine ki shiphew snem ba la leit bad ha kaba u la jop ruh ïa ka lympung PSL, The Hundred, ILT20, T10.
U la ïadon bynta ruh kum u Coach na ka bynta ka England, ha kaba u la lah ban ïalam ïa ka England sha ka jingjop ha ka lympung Ashes bad kumjuh ruh ha ka T20 World Cup ha u 2010 bad ban pynlong ïa ka Eng-land, ka kynhun ïalehkai test ba nyngkong ha ka pyrthei.
Haba kynthoh hadien ba la thung ïa u Andy Flower kum u head coach, u Prathmesh Mishra, uba long u Chairman jong ka of RCB, u la ong, “Ngi ai khublei ïa u Mike Hesson bad Sanjay Bangar na ka bynta ka kam kaba tbit kaba ki la pynpaw ha kine ki saw tylli ki aiom kiba la leit.”
Katba na ka liang jong u Hesson bad Bangar ha-ba pynthikna ba ki la mih na kane ka club, ki la ai khublei ïa ki nongpynïaid bad ki trai ka club kiba la ai ha ki ïa ka kabu ban ïatrei bad ki bad pynpaw ba ka jingdon jong ki ha kine ki saw aiom ka la long shisha ka khusnam kaba khraw bha.
