Ka jingïatai ha Lok Sabha halor kawei ka aiñ rew kaba ïadei bad ka jingpynïaid ïa ki kam ki jam ha ka sorkar Delhi ba la ïalam da ka seng AAP, ka Myntri Khynnah ka tnat Bar Ri, ka Meenakshi Lekhi, ka la byrngem hapoh Ïingdorbar Thawaiñ ha ka 3 tarik Nailar, 2023, ba ka Sorkar Pdeng ka lah ban phah wan da ka kynhun tohkit Enforcement Directorate sha ïing ki MP ka Liang Pyrshah. Kane ka jingbyrngem ka Myntri ka long katba ka dang ai jingkren bad uwei na ki MP ka Liang Pyrshah u la kynthoh halor ka jingpyndonkam ka Sorkar Pdeng ïa ka Enforcement Directorate lane ED. Haba jubab ïa kane ka jingkynthoh, ka Myntri ka la ong, “Shi minit, long jai-jai lym kumta ka ED ka lah ban wan syndon haduh ha ïing.” Wat la ka Lekhi ka la pynshai hadien ba kane ka dei tang ka jingkynthoh biria, hynrei ka Liang Pyrshah ka la shim ba ka dei ka jingbyrngem ïa ki MP ki bym don ha ka sorkar BJP.
Ngim sngewphylla shuh ba kum kitei ki jingkren ne jingkynthoh kin wan na ki Myntri ne MP kiba na ka seng BJP. Ngi la ïohi ba ha kine ki 9 snem tam jong ka jingsynshar ka BJP, ki kynhun tohkit ki la bunkam ban leit khynra ïa ki ïing ki sem bad ki shlem treikam jong ki MP ne MLA ki bym dei ki dkhot ka BJP, hynrei kiba shong ha ka liang pyrshah. Shibun bah ki MP/MLA ka Liang Pyrshah kiba la shah kem bad kiba dang shong ha patok halor ka jingshah kem namar ka jingkynnoh ba ki la donkti ha ki kam bamsap bamngem. Hynrei lada don pat ki sakhi/sabut pyrshah ïa ki MP/MLA ka Liang Pyrshah tangba kiba kloi pat ban wan rung sha ka BJP, kita ki jingbyrngem ban kem ne ka jingleit khynra ki shu kut noh kumto. Ka BJP ka ju shah kynnoh ba ka long thik kum kato ka kor ba pyndonkam ban saitjaiñ ha kaba ki jaiñ kiba jaboh katno-katno ruh ki khuid beit shisien ba la thep ha kata ka kor. Ka long ruh kumjuh ïa kito ki MP/MLA kiba leit rung sha ka BJP hadien ka jingshah kynnoh ba bun ba ki donkti ha ki kam bamsap bamngem, bad kita ki shu jah noh ynda ki la leit ïasnohkti bad ka BJP.
Ngi kynmaw ba ha ka por ilekshon MLA ha Meghalaya mynta u snem, u Myntri Rangbahduh, u Narendra Modi, u Myntri Korbar Ri, u Amit Shah, bad shibun bah ki nongïalam ka BJP ki la wan sha kane ka jylla ban kynnoh bamsap bamngem ïa ka sorkar u Conrad K. Sangma. U Amit Shah lei u la kynthoh syndon da kaba ong ba ka Meghalaya ka wan hakhmat duh ha ka Ri India ha ki kam bamsap bamngem. Hynrei ynda la dep ka ilekshon pat, kine kijuh ki briew ki la wan ban sakhi bad thap kti ha ka por ba u Conrad bad ka kynhun ki la bam smai ban shimti ïa ka sorkar Meghalaya Democratic Alliance 2.0. Ki nongïalam ka BJP ki la sait khuid da kaba ong ba kito ki jingkynthoh baroh ki dei tang ki buit ban khroh ‘vote’. Lada dei shisha ba ka BJP ka long ka seng kaba ngeit ha ka jingsynshar kaba khuid ba suba, ka la dei ban phah wan naduh mynno ïa kita ki CBI, ki ED bad kiwei ban tohkit ha kane ka jylla namar ngi tip ba ki don shibun bah ki kam bamsap bamngem kiba la kjit ïa ka pisa paidbah.
Hynrei ki nongïalam ka BJP kum katei ka Myntri Sorkar Pdeng kin ym leh kumta namar ka BJP ka don lang ha ka sorkar u Conrad bad ka National People’s Party (NPP) ka dei ka seng kaba ïatreilang hapoh ka lama jong ka National Democratic Alliance (NDA). Ka jingarsap ka paw shai shabar bad kiba shu kut ha ka lyngngoh ki dei ki paidbah. Ki nongshong shnong ka Meghalaya ki thrang dik-dik ba ka CBI lane ED kin wan sha kane ka jylla ban sei madan ïa baroh ki kam jaboh kiba la jia ha kine ki hynriew snem tam – naduh ka jingtih bad jingkit be-aiñ ïa u dewïong bad haduh ki kam kiba ïadei bad ka tnat bording. Ka BJP ha Delhi kam don satia ka jingkitkhlieh ban wanrah ïa ka synshar ka khadar kaba khuid bad kaba ïaid beit, bad ka shu kwah beit tang kumno ban jop ilekshon. Kane ka BJP kaba mynta kam ïapher eiei na ka Congress kaba mynshwa ha ka por ba ka dang don ha ka bor ha Delhi. Ka Congress ruh ka la leh kumjuh pyrshah ïa ki nongïalam ka Liang Pyrshah. Kiba sah biej sah duh ki dei ki paidbah jong ka Ri namar kane ka jingïalehkai saiñpyrthei jong ki seng kiba synshar ha Delhi.
