Bangkok, Nailar:
Ha kane ka jingjia, la ong ba 8 ngut ki la khlad noh hadien ba ka rel ka la kum leit rat ia ka trok kaba dang iaid lyngba ia ka lynti rel hapoh Thailand ha ka Sngi Thohdieng.
Kane ka la jia ha ka por kumba 2:20 mynstep hapoh ka thaiñ Chachoengsao, kaba don sha ka phang mihngi jong ka nongbah Bangkok.
La ong ba u nongñiah jong katei ka rel u la ai horn katba lah ban phah kynriah ia katei ka trok kaba kit dohkha, hynrei um shym lah shuh pat ban pynsangeh ia ka rel hashwa ba kan leit tyngkhuh bad leit rat syndon ia katei ka trok kaba dang thmu ban kam sha shiliang jong ka lynti iaid rel.
Kitei ki 8 ngut kiba khlad, ki kynthup ia 5 ngut ki shynrang bad 3 ngut ki kynthei.
Katba, 4 ngut pat ki la mynsaw, ha kaba uwei napdeng jong ki u la mynsaw jur bha bad u don hapdeng ka jingsumar hapoh ka hospital.
La ong ba uwei u samla 20 snem uba shong ha katei ka trok, u la lait im da kaba kynthih noh shabar jong katei ka trok. Utei u samla u iathuh ba ha katei ka sngi katba ka trok ba ki shong ka dang mut ban kam sha shiliang jong ka lynti rel hynrei ki la iohi kynsan ia katei ka rel kaba la wan poi kynsan-kynsan tang kumba katto katne spah metre.
Hynrei ki jingjia aksiden ki long kiba khah- khah hapoh Thailand bad ka Thailand ka la ju bud nam ruh halor ka jingdon ia ki surok kiba sniew tam ban ia nujor bad kiwei pat ki ri.
Ha u Risaw jong u snem 2020, 18 ngut ki briew ki la duh ei la ka jingim hadien ba ka rel ba ki shong ka la leit rat beit-beit ia ka bos kaba dang kit ia ki riewngeit kiba dang mut ban leit sha ka jingleh niam ha katei ka por.
