Washington, Nailar:
Ha kane ka khubor la ong ba uwei u briew uba dei na ka nongbah Georgia jong ka United States, u la khlad noh hadien ba u ioh ia ka jingshitom jabieng kaba kham pher ia kaba la ju tip kum ka ‘Brain-eating Amoeba’.
Katkum ka kaiphod na ka Georgia Department of Public Health, la ong ba utei u briew u la ioh ia katei ka jingpang na ka jingleit jngi ha kawei ka pung lane ka nan kaba don ia ka um kaba khuid.
Katba, ia ki jingtip ba bniah naduh ka kyrteng, ka snem jong utei u briew ym shym la pynpaw paidbah.
Katei ka jait jingshitom, la ong ba ka long ba kitei ki khñiang jingpang ki ju bam ia ka jabieng jong u briew haduh ba ka met jong u briew kam lah shuh ban iakhun bad kan iap syndon haba la poi sha ki bynta ba khatduh. Ia katei ka jingpang la ju ioh kem ne ngat na um.
Ki la don kumba 5 tylli ki jingjia kiba kum kine hapoh Georgia naduh u snem 1962 bad ia katei ka jingpang la ju tip ruh kum ka ‘Naegleria Fowleri’.
Katkum ka jingiathuh jong ka tnat pule bniah Centre for Disease Control & Prevention jong ka United States, ki khñiang jingpang jong ka Naegleria Fowleri ki dei kiba im ha ka khyndew bad ha ka um kaba syaid, kum ki nan, ki wah bad pung.
Kumta la ju khot ia kitei ki khñiang jingpang kum ki ‘ki khñiang bam jabieng’ bad kitei ki khñiang jingpang ki ju rung sha ka met jong u briew lyngba ka um kaba ioh jaka ban rung lyngba u khmut, khamtam ha ka por ba jngi ha um. Kane ka jingpang, ka long kaba kham ñiar ban shem bad ka long ruh ka jingpang kaba ma bad ka bym pat ju lah ban sumar ne pynkhiah.
Ki katto katne ki dak jingshitom haba ioh ia katei ka jingpang ki long kum ka jingdap shadem, kynroi prie bad kiwei kiwei de kiba ki briew kin ym poi pyrkhat wat haba ki ioh kem ia katei ka jingpang kaba shyrkhei ruh bad kitei ki dak jingshitom kin sdang ban paw shabar hadien 5 sngi ba utei u khñiang jingpang u la ioh ban rung ha ka met u briew.
