Imphal, Nailar:
Ki la don palat 14,000 ngut ki khynnah skul kiba la kynriah jaka sah na ka jylla Manipur hadien ba la mih ki jingïakynad kiba jur, la ong ka tnat pule-puthi.
La don palat 93 percent na kine ki khynnah kiba la shah pynrung ha ki skul ba marjan, la ong ka Myntri ka sorkar kmie kaba dei khmih ïa ka tnat pule-puthi ka Annapurna Devi ha ka jingthoh ba ka la ai jubab ha Rajya Sabha.
“Ki la don baroh kumba 14,763 ngut ki khynnah kiba dang dei ban leit skul kiba la kynriah jaka sah na ka daw ki jinglong jingman ha Manipur. Ïa u Nodal Officer la tung haman kawei pa kawei ka jaka sah jong ki khnang ban lah ban pyntreikam na ka bynta ban pynrung skul ïa ki khynnah kiba la kynriah jaka sah,” ka la ong.
Ki la don kumba 93.5 per cent na ki khynnah kiba la kynriah jaka sah kiba la shah pynrung ha ki skul ba marjan bad ki jaka ba ki sah, ha kaba la pyllait ei khlem donkam ban siew”, la ong ka Myntri.
Ki la don palat 160 ngut ki briew kiba la shah pynïap bad da ki spah ngut kiwei pat kiba la mynsaw na ki jingïakynad bajur ba la mih ha ka jylla Manipur ha ka 3 tarik, Jymmang, hadien ba la pynlong ïa ka ‘Tribal Solidarity March’ ha ki distrik ba bun ban pyrshah halor ka jingdawa jong ka kynhun jait bynriew Meitei ba kin shah kynthup hapoh ka Scheduled Tribe (ST).
