Shillong, Nailar 06:
Ïa ka National Games 2023 yn pynlong ha Goa naduh 25 tarik u Risaw haduh 9 tarik u Naiwieng mynta u snem, la pynthikna u Myntri ka tnat ïalehkai ka Sorkar Goa u Govind Gaude.
Ha ka jingshisha ka Goa ka la dei ban pynlong ha u snem ba la dep, namar kiba bun ki daw la kynriah noh sha Gujarat. Kumta mynta ka kynti ka la khreh ban pynlong ïa kane ka lympung ka ban syrïem kum ka Olympic ha kaba kiba bun ki khlur ïalehkai kin wan ïashim bynta.
Haba pynpaw hapoh ka Ïingdorbar thawaiñ, u Govind Gaude u la ong, “Ka dei ban don ka jingkyntiew ïa ki kam ïalehkai ha ka jylla lyngba ka National Games. Ka thong ka jong ngi ka long ban kyntiew ïa ki jingïalehkai da kaba pynkhie im biang ïa ka National Games. Ym tang ban plie lad ïa ki nongïalehkai na ka bynta ka Goa, hynrei ba ki dei ban ïoh ïa ka lad ban ïalehkai na ka bynta ka kynhun jong ka ri.”
U la ong ruh ba u Myntri Rangbahduh ka ri Narendra Modi un pynkhreh ban wan plie ïa kane ka lympung ïalehkai kaba heh jong ka ri.
Nalor kata, u la ong ruh ba na ka liang katei ka sorkar ka la pynkhreh ban pyllait ïa ka mang pisa kaba T. 2.54 klur na ka bynta ki lad jingïarap sha ki synjuk ïalehkai bad T. 73 lak na ka bynta ki nongïalehkai ki ban khur takma.
Ïa kane ka lympung la pynlong ha ka sien nyngkong eh ha Lahore, ha kaba ym pat pynïaphiah ïa ka India. Ha u snem 1924 bad ha kito ki por la tip kum ka Indian Olympic Games haduh u 1938.
Haba phai sha kane ka lympung kaba la long ha u snem ba la dep ha Gujarat, ka Services Sports Control Board (SSCB) ka la khur ïa ka nam lahduh da kaba ïoh khur haduh 128 tylli ki takma. Ka Maharashtra ka la wan ba-ar da kaba khur 140 tylli ki takma (hynrei ka la ïoh duna eh ki takma ksiar kata tang 39 tylli ban ïa ka SSCB). Ka Haryana ka la khur 38 tylli ki takma ksiar bad haba kheiñ lang baroh ka la ïoh 116 tylli.
