Nongstoiñ, Nailar 06:
Ka Meghalaya State Badminton Association (MSBA) ka la pynbna ïa ki kyrteng ki khynnah ïalehkai ki ban mihkhmat ïa ka Jylla sha ki ar tylli ki lympung ïalehkai ki ban long shabar jylla.
Ki khynnah ïalehkai Under-19 ki kynthup ïa u Benhanan Kharmawphlang, Guarav Kumar Singh, Pratiksha Joshi, Ibanpynhun Shisha bad Ardor Marbiang. Kine ki khynnah ki la shah jied ban leit shim bynta ha ka Junior Nationals ka ban long ha Bangalore naduh 7 haduh 12 tarik u Nailur mynta u snem.
Kane ka synjuk ka la jied ruh ïa ki khynnah ïalehkai ki ban leit shim bynta ha ka Sub-Junior Nationals Under-15 bad Under-17 ka ban long ha Hyderabad naduh 14 haduh 19 tarik u Nailur mynta u snem.
Ha ka Under-15 ki long u Gavin Kharbuki, Amrit Singh, Netania T. Tariang bad ka Deiphishisha Dohling. Katba ha ka Under-17 ki kynthup ïa u Raynell Kharbuli, Vivian Laloo, Badream Momin, Pratiksha Joshi bad ka Sneha Chhetri.
Ka jingjied ïa kitei ki nongïalehkai ka la wan hadien ba ki la lah ban pynpaw ïa ka jingtbit ha ka 38th Meghalaya Badminton Championship 2023 kaba la kut ha ka sngi Saitjaiñ ha Nongstoiñ, West Khasi Hills.
